မိုင်းရူပ၊ နိုဝင်ဘာ ၅ ရက်၊ လားရှိုး
ရှမ်းမြောက် လားရှိုးမြို့မှာ စစ်ကောင်စီရဲ့ ယာဉ်ထိန်းရဲတွေက ယာဉ်မောင်းလိုင်စင်၊ ကားနံပါတ်ပြားတွေ ရှောင်တခင်စစ်ဆေးနေပြီး ငွေသိန်းချီတောင်းကာ ပြန်လွှတ်ပေးနေတယ်လို့ ရွှေဖီမြေက စုံစမ်းသိရှိရပါတယ်။
လားရှိုး–နမ္မတူမြို့အထွက် နမ္မတူမီးပွိုင့်နဲ့ လားရှိုးကြီးမီးပွိုင့်မှာ ဖြတ်သန်းသွားလာတဲ့ ကားတွေကို စစ်ကောင်စီရဲ့ ယာဉ်ထိန်းရဲတွေက ရှောင်တခင်စစ်ဆေးတာတွေ ပြုလုပ်နေတာ ဖြစ်ပါတယ်။
ဒီနေ့ နိုဝင်ဘာ ၄ ရက်မှာလည်း လားရှိုးကြီးမီးပွိုင့်မှာ ဖြတ်သန်းသွားလာတဲ့ ကားတွေကို ယာဉ်ထိန်းရဲတွေက ယာဉ်မောင်းလိုင်စင်၊ ကားနံပါတ်ပြားတွေကို စစ်ဆေးနေတယ်လို့ လားရှိုးဒေသခံအမျိုးသားတစ်ဦးက ရွှေဖီမြေကို ပြောပါတယ်။
“အခုက လားရှိုးကြီးမီးပွိုင့်မှာ ဖမ်းနေတာ။ ဒီကောင်တွေက မထင်ရင် မထင်သလို ကောက်ဖမ်းတာ။ ယာဉ်မောင်းလိုင်စင်တွေ ကောက်တောင်းပြီး ၅ သောင်း၊ ၁ သိန်း၊ ၃ သိန်း ကောက်တောင်းတာ။ ကျနော် သူငယ်ချင်းတွေဆို ၃ သိန်းပေးရတယ်” လို့ ဆိုပါတယ်။
လားရှိုးမြို့ကို စစ်ကောင်စီ စတင်ထိန်းချုပ်ချိန် လိုင်စင်မဲ့ကားတွေကို ဖမ်းဆီးတာ မရှိပေမယ့် ဒီနောက်ပိုင်းမှာ ဖမ်းဆီးစစ်ဆေးတာတွေ ပြုလုပ်လာတာ ဖြစ်ပါတယ်။
တရုတ်နိုင်ငံရဲ့ ကြားဝင်စေ့စပ်မှုကြောင့် MNDAA နဲ့ စစ်ကောင်စီတို့အကြား အပစ်ရပ်ခဲ့ပြီး ကိုးကန့်တပ်မတော်–MNDAA ထိန်းချုပ်ထားတဲ့ လားရှိုးမြို့ပေါ်က နေရာတွေကို ပြီးခဲ့တဲ့ ဧပြီလထဲမှာ စစ်ကောင်စီထံ ပြန်လည်လွှဲပြောင်းပေးခဲ့ရတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
