မိုင်းရူပ၊ ဖေဖော်ဝါရီ ၁၇ ရက်၊ လားရှိုး
ကိုးကန့်တပ်မတော်- MNDAA ထိန်းချုပ်ထားတဲ့ ရှမ်းမြောက် လားရှိုးမြို့မှာ ၅ နှစ်အောက် ကလေးငယ်တွေကို ကာကွယ်ဆေး အခမဲ့ ထိုးပေးနေတယ်လို့ လားရှိုးပြန်လည်ထူထောင်ရေးက မနေ့ ဖေဖော်ဝါရီ ၁၆ ရက်မှာ သတင်းထုတ်ပြန်ထားပါတယ်။
မနေ့နဲ့ ဒီနေ့ ဖေဖော်ဝါရီ ၁၇ ရက်အထိ ရပ်ကွက် ၁ နဲ့ ၁၂ ရှိ မိခင်နဲ့ကလေး စောင့်ရှောက်ရေး၊ အထွေထွေရောဂါကု ဆေးခန်းတွေမှာ နှစ်ရက်တာ ထိုးပေးမှာ ဖြစ်တယ်လို့ ဆိုပါတယ်။
“မနေ့ကရယ် ဒီနေ့ နှစ်နေရာ ခွဲထိုးပေးနေပါတယ်။ လစဥ် ထိုးပေးသွားမယ်လို့ သိရတယ်။ ဘယ်ဒေသကမဆို ထိုးပေးပါတယ်။နေရပ် မခွဲခြားဘူး” လို့ လားရှိုးဒေသခံတစ်ဦးက ရွှေဖီမြေကို ပြောပါတယ်။
ကာကွယ်ဆေး ထိုးနှံလိုသူတွေအနေနဲ့ လစဥ် ၁၆ ရက်၊ ၁၇ ရက်မှာ လာရောက် ထိုးနှံနိုင်တယ်လို့ လားရှိုး ပြန်လည်ထူထောင်ရေးက ပြောပါတယ်။
အထူးဒေသ ၁ ရဲ့ ကျန်းမာရေးဌာနဟာ ပြီးခဲ့တဲ့ ၂၀၂၄ ခုနှစ်အတွင်း ကလေးငယ်ပေါင်း ၁ သောင်းကျော်ကို ကာကွယ်ဆေး ထိုးပေးနိုင်ခဲ့တယ်လို့ ဆိုပါတယ်။
လားရှိုးမြို့ကို ပြီးခဲ့တဲ့ ၂၀၂၄ ဩဂုတ် ၃ ရက်မှာ MNDAA နဲ့ပူးပေါင်းတပ်က တိုက်ခိုက်သိမ်းပိုက်ပြီး MNDAA က စီမံအုပ်ချုပ်နေတာ ဖြစ်ပါတယ်။
