မိုင်းရူပ၊ စက်တင်ဘာ ၁၉ ရက်၊ ကျောက်မဲ
တအာင်းတပ်ထိန်းချုပ်ထားတဲ့ ကျောက်မဲမြို့ကို ဦးတည်ထိုးစစ်ဆင်တိုက်ခိုက်နေတဲ့ စစ်ကောင်စီနဲ့ တအာင်းတပ်မတော် – TNLA အကြား တိုက်ပွဲဆက်လက် ပြင်းထန်နေတယ်လို့ ရှေ့တန်း စစ်မြေပြင်မှာ ရှိနေသူ တစ်ဦးက ရွှေဖီမြေကို ပြောပါတယ်။
“အခု စစ်ကောင်စီဘက်က ကောင်းမူလွယ်ရွာဘက်ကို ပြန်ထိုးနေတာ။ ကောင်မူလွယ်က ပင်တိန်နဲ့ ခိုက်တုန်းဟုန်းရွာကြား လမ်းမကြီးအပေါ်ဘက်မှာ ရှိတယ်။ အပြန်အလှန် ထိုးစစ်ဆင်တိုက်ခိုက်နေတာ။ တိုက်ပွဲက ဆက် ပြင်းထန်နေတယ်” လို့ ဆိုပါတယ်။
လက်ရှိအခြေအနေအရ စစ်ကောင်စီဘက်က ကျောက်မဲမြို့ဘက်ကို ထိုးစစ်ဆင်မှုထက် ဂုတ်တွင်း–နောင်ပိန် လမ်းပိုင်းကို အရင်ထိန်းချုပ်ဖို့ ကြိုးစားနေပြီး အဲဒီလမ်းပိုင်းက ကျေးရွာတွေကို ထိုးစစ်ဆင်တိုက်ခိုက်နေတာ ဖြစ်ပါတယ်။
လက်ရှိအချိန်အထိ စစ်ကောင်စီထိုးစစ်ကို တအာင်းတပ်ဘက်က ခုခံနေဆဲ ဖြစ်ပေမယ့် ဂုတ်တွင်း–နောင်ပိန် လမ်းကြောင်းကို စစ်ကောင်စီထိန်းချုပ်နိုင်ခဲ့ရင် ၎င်းတို့အတွက် စစ်အင်အားနဲ့ လက်နက်ခဲယမ်းတွေ လွယ်လွယ်ကူကူ ပို့ဆောင်နိုင်မယ့်အခြေအနေ ဖြစ်ပါတယ်။
စစ်ကောင်စီတပ်ရဲ့ ထိုးစစ်ကြောင့် ကျောက်မဲမြို့နယ်ထဲ စစ်ကောင်စီနဲ့ TNLA အကြား တိုက်ပွဲ ပြင်းထန်နေတာ တစ်လနီးပါး ရှိလာပြီ ဖြစ်ပါတယ်။
စစ်ကောင်စီတပ်ဟာ ကျောက်မဲနဲ့ သီပေါမြို့နယ်ကို ရွေးကောက်ပွဲ ကျင်းပမည့် နယ်မြေထဲ ထည့်သွင်းထားပြီး ရွေးကောက်ပွဲမတိုင်ခင် အဲဒီမြို့နယ် ၂ ခုကို ထိန်းချုပ်ဖို့ ထိုးစစ်ဆင်တိုက်ခိုက်နေတာ ဖြစ်ပါတယ်။
ဒါ့အပြင် နောင်ချို–မိုးကုတ် လမ်းပိုင်းမှာလည်း TNLA တပ်ကို စစ်ကောင်စီဘက်က ထိုးစစ်ဆင်နေမှုတွေ ပြုလုပ်နေပြီး တိုက်ပွဲတွေ နေ့စဉ်လိုလို ဖြစ်ပွားနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
