လွေးလာဝ်ဇာရ်၊ ဖေဖော်ဝါရီ ၁၉ ရက်၊ ကျောက်မဲ
တအာင်းတပ် ထိန်းချုပ်ထားတဲ့ ကျောက်မဲမြို့မှာ တအာင်းတပ်မတော်- TNLA ရဲ့ ဝတ်စုံကို အလွှဲသုံးစားလုပ်ပြီး ခိုးမှု၊ ခြိမ်းခြောက်မှု ပြုလုပ်သူတွေ ရှိနေတယ်လို့ ကိုယ်တိုင် ကြုံခဲ့ရသူ ကျောက်မဲဒေသခံ အမျိုးသားတစ်ဦးက ပြောပါတယ်။
ပြီးခဲ့တဲ့ ဖေဖော်ဝါရီ ၂ ရက်မှာ TNLA ရဲ့ဝတ်စုံ ဝတ်ထားသူက အိမ်ထဲ ဝင်လာပြီးတော့ ရဲတပ်ဖွဲ့ကဆိုပြီး ခြိမ်းခြောက်ခဲ့တာလို့ ဆိုပါတယ်။
“အဲနေ့က အဲနှစ်ယောက်က အဖွားကို သွားခြိမ်းခြောက်တာ။ အင်္ကျီအဖြူနဲ့တစ်ယောက် ပြောတာက ငါက TNLA တဲ့၊ အင်္ကျီအမဲရောင်နဲ့တစ်ယောက် ပြောတာက ငါက ရဲတဲ့။ ပြီးမှ အဖွားက အိမ်သာဘက်သွားတော့ ဖုန်းကို ခိုးယူသွားတာ”
TNLA ရဲ့ နာမည်နဲ့ ဝတ်စုံ အလွှဲသုံးစား လုပ်တဲ့သူ ၃ ဦးကို ဖမ်းမိထားတယ်လို့ ကျောက်မဲမြို့မှ တအာင်းတပ်ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
“ကျနော်တို့တပ်ဖွဲ့ ဖမ်းမိထားတဲ့သူတွေက စစ်သားထဲက တစ်ယောက်မှ မဟုတ်ဘူး။ ဒေသခံတွေဘဲ။ TNLA ဝတ်စုံ ဝတ်ပြီး ဒေသခံတွေကို ခြိမ်းခြောက်တာ။ အဲဒီဝတ်စုံတွေလည်း ပစ်ထားတဲ့ ဝတ်စုံအဟောင်းတွေပါ”
ကျောက်မဲမြို့မှာ ဆိုင်ကယ်ပါဝါအိတ်ဇော တပ်ပြီး မောင်းလာတဲ့ ဒေသခံ ၂ ဦးကို ရဲတပ်ဖွဲ့က ဖမ်းပြီး ဒဏ်ငွေ ၁ သိန်းခွဲ ဆောင်ခိုင်းတဲ့ဖြစ်စဥ္ကလည်း ရဲတပ်ဖွဲ့ထဲကမဟုတ်ဘဲ အခုလို ဖြစ်ရပ်မျိုးရှိရင် လာရောက် တိုင်ကြားနိုင်တယ်လို့ ဆိုပါတယ်။
“ဆိုင်ကယ်ကိစ္စလည်း ကျနော်တို့ စစ်ဆေးကြည့်ပြီးပြီ။ ကျနော်တို့ တပ်ဖွဲ့ထဲက မဟုတ်ဘူး။ သူတို့ပြောနေတဲ့ ဖုန်းဆိုင်တွေမှာ ပိုက်ဆံ လိုက်ကောက်တယ်ဆိုတာလည်း ကျနော်တို့ထဲက မဟုတ်ဘူး။ TNLA နာမည်ကို အလွှဲသုံးစား လုပ်တာ”
ကျောက်မဲမြို့ကို ၁၀၂၇ စစ်ဆင်ရေး ဒုတိယလှိုင်းအတွင်း ၂၀၂၄ ဩဂုတ် ၅ ရက်မှာ တအာင်းတပ်က တိုက်ခိုက်သိမ်းပိုက်ပြီးတော့ လက်ရှိမှာ အုပ်ချုပ်ရေးယန္တရား လည်ပတ်နေတဲ့မြို့ ဖြစ်ပါတယ်။
