မိုင်းပန်ပျော်၊ ဧပြီ ၃ ရက်၊ မူဆယ်
ရှမ်းမြောက် တရုတ်-မြန်မာနယ်စပ် မူဆယ်မြို့ ဆင်ဖြူပေါက်ဂိတ်မှာ မူဆယ် လူဝင်မှုကြီးကြပ်ရေးဌာန (လဝက)ရဲ့ အရာရှိတစ်ဦးက အသက် ၅၈ နှစ်အရွယ် အမျိုးသမီး ၁ ဦးကို မူးလဲတဲ့အထိ ရိုက်နှက်ခဲ့တယ်လို့ ဒေသခံတွေက ရွှေဖီမြေကို ပြောပါတယ်။
ဖြစ်စဉ်ဟာ ဧပြီ ၁ ရက် မနက် ၈ နာရီခွဲမှာ ဖြစ်ပွားခဲ့တာပဲ ဖြစ်ပါတယ်။
“သူက တရုတ်ပြည်ကို အဝင်အထွက် လုပ်တာ။ တရုတ်ပြည်ဘက် ဝင်ပြီးတော့မှ ပစ္စည်းဝင်သယ်ပြီးရင် မြန်မာဘက် လာပို့ အဲလိုပေါ့။ အဲနေက လဝကလူက ဆဲဆိုပြီးတော့မှ ရမ်းကားဆွဲပြီးတော့ လူကို တွန်းလဲတယ်။ ပြီးတော့ ၂ ချက် ၃ ချက်တောင် ရိုက်တာ မူးလဲသွားတာ။ မူဆယ် လဝက ကလူတွေ တအားမိုက်ရိုင်းတာ အဲနေ့က သူတို့လူကြီးလမ်းကြောင်း ရှိတယ်ဆိုပြီးတော့ အဲလိုရိုက်ဝာာ”
ရိုက်နှက်ခံရတဲ့ အမျိုးသမီးကို ဒီနေ့ ဧပြီ ၃ ရက်မှာ တောင်းပန်ခဲ့ပေမဲ့ ကျူးလွန်သူကိုယ်တိုင်မဟုတ်ပဲ အောက်ခြေဝန်ထမ်းတွေသာ လာရောက် တောင်းပန်ခဲ့တယ်လို့ ၎င်းက ဆက်ပြောပါတယ်။
လဝက အရာရှိ ရိုက်နှက်တာ ခံရတဲ့ အမျိုးသမီးဟာ မူဆယ်မြို့မှာ နေထိုင်တဲ့ ဒေါ်အီခမ်းဆိုသူ ဖြစ်တယ်လို့ သိရပါတယ်။
