ခိုင်လေး၊ မတ်လ ၂ ရက်၊ ရွာငံ
ရှမ်းတောင် ဓနုဒေသ ရွာငံမြို့နယ် မင်းပလောင်ရွာက စစ်ရှောင်တွေ ပြီးခဲ့တဲ့ ဇန်နဝါရီလကတည်းက အရေပြားရောဂါ ခံစားနေရတယ်လို့ ဓနုပြည်နယ်အမျိုးသား ကာကွယ်ရေးတပ်ဦး- DSNDA ရဲ့ ပြန်ကြားရေးတာဝန်ခံ ကိုကျားပျံက ရွှေဖီမြေကို ပြောပါတယ်။
စစ်ရှောင်တဲ့ ဒေသခံတွေဟာ နေရပ်သို့ မပြန်ရဲကြသေးဘဲ တောတောင်တွေထဲ တဲဆောက်ပြီး နေကြရတာကြောင့် မြစ်ချောင်းက ရေတွေကိုသာ သောက်သုံးရေနဲ့ တစ်ကိုယ်ရေ သန့်ရှင်းရေးအတွက်ပါ အသုံးပြုနေရတာပါ။
“ရေကြောင့်လို့တော့ ထင်မြင်ချက်တွေ ရှိပါတယ်။ ချောင်းရေ မြစ်ရေတွေဆိုတော့ သန့်ရှင်းမှု မရှိပါဘူး။ ယားနာပေါက်တာတွေ ဖြစ်တယ်။ ကလေးငယ်တွေလည်း ပါတယ်။ ခံနေရတဲ့သူက ၂ဝဝ လောက်တော့ ရှိမယ်” လို့ DSNDA ရဲ့ ပြန်ကြားရေးတာဝန်ခံ ကိုကျားပျံက ပြောပါတယ်။
အရေပြားရောဂါနဲ့ပတ်သက်ပြီး ဆေးဝါး ဖြည့်တင်းပေးတာ ရှိပေမဲ့ ရောဂါကုသဖို့အတွက်လည်း ထပ်မံ လိုအပ်နေတာကြောင့် ဆေးဝါးအတွက် တတ်နိုင်သလောက် ပါဝင်ကူညီလိုသူတွေအနေနဲ့ DSNDA Page ကနေ ပါဝင်ကူညီပေးကြဖို့လည်း သူက ဆက်ပြောပါတယ်။
ပြီးခဲ့တဲ့ ၂၀၂၄ ခုနှစ် ဒီဇင်ဘာ ၂၂ ရက်နဲ့ ၂၃ ရက်မှာ စစ်တပ်ရဲ့ နှစ်ရက်ဆက်တိုက် မီးရှို့ဖျက်ဆီးမှုကြောင့် မင်းပလောင်ရွာက ဒေသခံ ၇၀၀ ဝန်းကျင်ဟာ တောတောင်တွေထဲ ထွက်ပြေးတိမ်းရှောင်ကာ တဲဆောက်ပြီး နေထိုင်နေကြရတာပဲ ဖြစ်ပါတယ်။
