မိုင်းရူပ၊ သြဂုတ် ၈ ရက်၊ ကျောက်မဲ
မိုးအဆက်မပြတ် ရွာသွန်းမှုကြောင့် ရေကြီးရေလျှံမှု ဖြစ်ပွားခဲ့တဲ့ တအာင်းတပ်မတော်- PSLF/TNLA ထိန်းချုပ်ထားတဲ့ ကျောက်မဲမြို့နယ်မှာ ရေနစ်မြှုပ်မှုကြောင့် ပြောင်းဖူးစိုက်ခင်း ဧက ရာနဲ့ချီ ပျက်စီးခဲ့တယ်လို့ ဒေသခံတွေက ပြောပါတယ်။
ရေနစ်မြှုပ်မှုကြောင့် ကျောက်မဲမြို့နယ် နောင်ပိန်ရွာက ပြောင်းဖူးခင်းအပါအဝင် ပုံဝိုး၊ ဆိုင်ခေါင်ရွာကနေ နောင်ကွမ်ချောင်းတလျှောက်ရှိ ပြောင်းဖူးခင်းတွေ ပျက်စီးသွားတယ်လို့ ဆိုပါတယ်။
“ရေ တိုက်စားသွားတဲ့လမ်းကြောင်းက ပြောင်းခင်း၊ စပါးခင်းမှန်သမျှ လဲကုန်တာပေါ့။ ပြန်ပြီးတော့ အဖူးဖြစ်နိုင်ဖို့တော့ မလွယ်တော့ဘူး။ အဖူးဖြစ်ခါမှာ အဲလိုဖြစ်သွားတာ” လို့ နောင်ပိန်ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ရေနစ်မြှုပ်မှုကြောင့် ပျက်စီးသွားတဲ့ ပြောင်းဖူးခင်း အတိအကျကို မသိရသေးပေမဲ့ ဧက ၁၀၀ ကျော် ရှိနိုင်တယ်လို့ ဒေသခံတွေက ပြောပါတယ်။
ပြီးခဲ့တဲ့ သြဂုတ် ၆ ရက် နေ့လယ်ပိုင်းကစပြီး ကျောက်မဲမြို့ပေါ်နဲ့ မြို့အနီးက ကျေးရွာတွေမှာ ရေကြီးရေလျှံမှု ဖြစ်ပေါ်ခဲ့ပြီး အမျိုးသား ၂ ဦးလည်း ရေထဲ မျောပါသေဆုံးခဲ့ပါတယ်။
ဇူလိုင်လဆန်းပိုင်းကစပြီး ရှမ်းပြည်နယ်အပါအဝင် နိုင်ငံတဝန်းက နေရာတချို့မှာ ရေကြီးရေလျှံမှု ဖြစ်ပေါ်ခဲ့ပြီး လူသေဆုံးတဲ့အထိ ရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
