လွေးထွေး၊ ဧပြီ ၆ ရက်၊ ပြင်ဦးလွင်
မန္တလေးမှာ ငလျင်ဒဏ်သင့်လို့ အဆောက်အဦး ပြိုကျပျက်စီးတာကြောင့် ပြင်ဦးလွင်မြို့သို့ လာရောက် ခိုလှုံချိန် ပြင်ဦးလွင်ရှိ အိမ်ခန်းနဲ့ ဟိုတယ်တချို့ဟာ ဈေးတက်လာလို့ စျေးကြီး ပေးပြီး တည်းခိုနေရကြောင်း ကိုယ်တိုင် ကြုံတွေ့နေရသူ အမျိုးသမီးရဲ့ ပြောပြချက်အရ သိရပါတယ်။
ပြီးခဲ့တဲ့ မတ်လ ၂၈ ရက် နေ့လယ် ၁ နာရီ ဝန်းကျင်မှာ ပြင်းအား ၇.၇ ငလျင် လှုပ်ခတ်ခဲ့တာကြောင့် မန္တလေး၊ စစ်ကိုင်းတိုင်း၊ နေပြည်တော်နဲ့ ရှမ်းတောင်က လူထုတွေ သေဆုံးခဲ့သလို အဆောက်အဦး ပျက်စီးခဲ့တာကြောင့် အဲဒီထဲမှာမှ မန္တလေးတိုင်းမှ ဒေသခံအများစုက ပြင်ဦးလွင်မြို့သို့ လာရောက် ခိုလှုံနေကြတာ ဖြစ်ပါတယ်။
ကိုယ်တိုင် ကြုံတွေ့နေရသူ အမျိုးသမီးက “မန္တလေးကလာတဲ့လူ အရမ်းများလို့ အစပိုင်းက ဟိုတယ်တွေ ပြည့်သလောက်ဘဲ။ ဟိုတယ်က အရမ်းဈေးများတော့ ဒီနောက်ပိုင်းက အိမ်ခန်းတွေ ပြန်လိုက်ရှာနေကြတာ။ မထူးပါဘူး အိမ်ခန်းနဲ့ ဟိုတယ် အတူတူလောက်ဘဲ ပေးရတာက။ တော်တော်လေး ဒုက္ခရောက်ရတယ်” လို့ ပြောပါတယ်။
ပုံမှန် မိသားစုခန်း တစ်ခန်းကို ၈ သောင်း ၁ သိန်းဝန်းကျင်အခန်းကို မတ်လ ၂၈ ရက် ညပိုင်းကစပြီး ၁ သိန်းခွဲကနေ ၂ သိန်းကြားပေးနေရသလို အရင်က အိမ်ခန်းငှားခ တစ်လ ၁ သိန်းဝန်းကျင်သာ ပေးရတဲ့ အိမ်ကိုတော့ ၂ သိန်းကျော်အထိ ပေးပြီး ငှားနေရကြောင်း ပြောဆိုပါတယ်။
ဒါ့အပြင် ပြင်ဦးလွင်မြို့မှာ K-Pay ငွေလွှဲငွေထုတ် လုပ်တာ ရှားပြီး စားသောက်ကုန်လည်း ဈေးတင်ရောင်းတာ ရှိနေကြောင်း နောက်ထပ် မြို့ခံ အမျိုးသမီးက ပြောပါတယ်။
“ဆိုင်တိုင်းတော့မဟုတ်ပေမဲ့ တချို့ကုန်စုံဆိုင်နဲ့ စားသောက်ဆိုင်တွေဆို အခွင့်ကောင်းယူပြီး ဈေးအတော်ကို တင်ရောင်းကြတာ ရှိတယ်။ တချို့ကတောင် ငလျင်ဘေးသင့်လူထုတွေ အလကား လာစားလို့ရတာလေးတွေတောင် လုပ်ပေးတာလည်း ရှိတယ်”
အလားတူ မတ်လကုန်ပိုင်းကလည်း ငလျင်ဒဏ် ခံနေရတဲ့နေရာတွေမှာ အလောင်းထည့်တဲ့ အိတ်တစ်ခုကို ၁ သောင်းခွဲ၊ ရေသန့်တစ်ဘူးကို ၂ ထောင်၊ ကြက်ဥတစ်လုံးကို ၁,၅၀၀ ကျပ်အထိ ပေးဝယ်ရတဲ့အပြင် နေရာတချို့မှာလည်း အလောင်း သယ်ထုတ်ခနဲ့ မြေတူးစက်ငှားခတွေ သိန်းဆယ်ချီ တောင်းနေတာတွေလည်း ရှိနေကြောင်း လူထုတွေရဲ့ ပြောပြချက်အရ သိရပါတယ်။
