မိုင်းပန်ပျော်၊ ဧပြီလ ၂၉ ရက်၊ ကျောက်မဲ
တအာင်းတပ်မတော်-TNLA ထိန်းချုပ်ထားတဲ့ ရှမ်းမြောက် မိုးမိတ် ကျောက်မဲမြို့နယ်နဲ့ နမ့်ခမ်းမြို့နယ် မိုင်းဝီးကျေးရွာတွေမှာ နေအိမ် မီးလောင်မှုဖြစ်ပွါးခဲ့လို့ ကာလတန်းဖိုး ကျပ်သိန်းပေါင်း ၃၀၀ ကျော် မီးလောင်ဆုံးရှုံးခဲ့တယ်လို့ တအာင်းတပ်မတော်-TNLA က ထုတ်ပြန်ထားပါတယ်။
ပြီးခဲ့တဲ့ ဧပြီလ ၂၆ ရက် ညနေ ၇ နာရီ ဝန်းကျင်မှာ နမ့်ခမ်းမြို့နယ် မိုင်းဝီးကျေးရွာအုပ်စု မာန်ဗူးကျေးရွာမှာ အိမ်ရှင်က မီးမငြိမ်းပဲ အပြင်သွားနေတဲ့အချိန် နေအိမ်မီးလောင်မှုဖြစ်ပွားခဲ့တယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
“အိမ်ရှင်က အပြင်သွားတာ မီးမငြိမ်းပဲသွားတာလေ။ အဲကနေစပြီး မီးလောင်ပြီးတော့ နောက်ထပ်တစ်အိမ် ထပ်ကူးသွားတယ် ၂ အိမ်စလုံးမီးလောင်သွားတာ။ လူတော့ထိတာမရှိဘူး။ မီးလောင်သွားတဲ့ဟာကတော့ အကုန်လုံးပါသွားတယ်။ သူတို့အိမ်ထဲက ပစ္စည်း ဆန် ၉၀ အိတ်ပါတယ်။ နောက်တစ်အိမ်လည်း ဆန် ၄၀ အိတ် မီးလောင်သွားတယ်”
ပြီးခဲ့တဲ့ ဧပြီလ ၂၆ ရက် ညနေ ၄ နာရီခွဲဝန်းကျင် မိုးမိတ်မြို့ လက်ခုတ်တန်းရပ်ကွတ်ထဲက နေအိမ်တစ်ခုမှာ ဘက်ထရီအိုးအပူလွန်ပြီး ပေါက်ကွဲခဲ့တာကြောင့် နေအိမ်မီးလောင်မှုဖြစ်ခဲ့တယ်လို့ PSLF/TNLA က ထုတ်ပြန်ချက်ထဲမှာဖော်ပြထားပါတယ်။
ဒါ့အပြင် ပြီးခဲ့တဲ့ ဧပြီလ ၂၅ ရက် ၁၂ နာရီခွဲအကျော် ကျောက်မဲမြို့နယ် တံခွန်တိုင်ကျေးရွာမှာလည်း အမှိုက်ရှို့ရာကနေ နေအိမ်တစ်လုံး မီးလောင်ပျက်စီးသွားခဲ့တယ်လို့ ဆိုပါတယ်။
မိုးမိတ်မြို့နဲ့ နမ့်ခမ်းမြို့နယ် မိုင်းဝီးမြို့နယ် မီးလောင်မှုကြောင့် နေအိမ် ၄ လုံးနဲ့ အိမ်ထဲမှာရှိတဲ့ပစ္စည်းတွေရဲ့ကာလတန်ဖိုး ကျပ်သိန်း ၃၀၀ ကျော် မီးလောင်ဆုံးရှုံးခဲ့တယ်လို့ ဆိုပါတယ်။
