ပို့လဘား၊ မေလ ၁၃ ရက်၊ နမ္မတူ
တအာင်းတပ် ထိန်းချုပ်ထားတဲ့ နမ္မတူမြို့မှာ မနေ့ မေလ ၁၂ ရက် ည ၁၀ နာရီခွဲဝန်းကျင်က နေအိမ်မီးလောင်မှု ဖြစ်ပွားခဲ့ပါတယ်။
မြို့မဈေးရပ်ကွက်ရှိ နေအိမ်တစ်လုံးကနေ ဝိုင်ယာကြိုး ရှော့လ်ဖြစ်ပြီး မီးလောင်မှု ဖြစ်ပွားခဲ့တာလို့ ရပ်ကွက်အတွင်း နေထိုင်သူ ဒေသခံတစ်ဦးက ပြောပါတယ်။
“မနေ့ည အသံတစ်ခု ကြားလိုက်လို့ ကျနော် ထကြည့်တော့ မီးလောင်နေပြီ။ အဲအိမ်မှာတော့ လူနေတာ မရှိတော့ဘူး။ သူတို့ရန်ကုန်မှာ နေကြတယ်။ သူတို့အိမ်မှာ မီးဖွင့်ထားလို့ ဝိုင်ယာကြိုး ရှော့လ်ဖြစ်ပြီး လောင်တာထင်တာပဲ။ အကုန်လုံး မီးလောင်ပြာကျတာ။ ဘာပစ္စည်းမှ မရတော့ဘူး။ အိမ်ကတော့တစ်အိမ်ပဲ တစ်ယောက်က ဘေးမှာ ငှားနေတာ။ သူစက်ချုပ်တယ်။ သူလည်း သူအပ်ချုပ်စက်တွေထုတ်ပြီး နဲနဲပဲပြန်ရတယ်။ ပစ္စည်းက အကုန်လုံး မီးလောင်ထဲ ပါသွားတယ်။ ဘေးကအိမ်တွေတော့ နဲနဲထိတယ်”
မီးလောင်မှုအတွင်း ဆုံးရှုံးသွားတဲ့ ပစ္စည်းပမာဏတန်ဖိုးကိုတော့ မသိရသေးပါဘူး။
မီးလောင်မှု ဖြစ်ပွားခဲ့တဲ့နေရာကိုတော့ တအာင်းတပ်ရဲ့ တာဝန်ရှိသူ၊ မီးသတ်တပ်ဖွဲ့နဲ့ လူထုတွေက ဝိုင်းဝန်းငြိမ်းသတ်ခဲ့ရာ ဒီနေ့မနက်အစောပိုင်း ၂ နာရီမှာ ငြိမ်းသတ်နိုင်ခဲ့တယ်လို့ ဆိုပါတယ်။
ပြီးခဲ့တဲ့ ဧပြီလအတွင်း ရွှေဖီမြေ ပြုစုထားတဲ့ စာရင်းအရ နမ့်ခမ်း၊ ကွတ်ခိုင်၊ ကျောက်မဲ၊ သီပေါ၊ မိုးမိတ် စတဲ့မြို့မှာ မီးလောင်မှု ၆ ကြိမ် ဖြစ်ပွားခဲ့ပြီး ဘုန်းကြီးကျောင်းဆောင်တစ်ခုနဲ့ နေအိမ် ၆ လုံး မီးလောင်ပျက်စီးခဲ့ပါတယ်။
