လွေးထွေး၊ ဧပြီ ၁၃ ရက်၊ လားရှိုး
ကိုးကန့်တပ်မတော် ထိန်းချုပ်ထားတဲ့ လားရှိုးမြို့မှာ စစ်ရှောင်သွားပြီး ပြန်လာမနေသေးတဲ့ အိမ်တွေကို ခိုးပြီး အရောင်းတင်နေသူ ရှိတာကြောင့် အဝယ်မမှားကြဖို့ အိမ်ရှင်ကိုယ်တိုင်က ပြောပါတယ်။
ဧပြီလ ပထမအပတ်ကစပြီး လားရှိုးမြို့ရှိ ရပ်ကွက်တချို့က စစ်ရှောင်သွားတဲ့ နေအိမ်တွေကို ခိုးပြီး အရောင်းတင်နေသူတွေ ရှိနေတာပါ။
အိမ်အရောင်းတင်ခံရသူ အမျိုးသမီးက “ကျမတို့ စစ်ဖြစ်ကတည်းက စစ်ရှောင်ထားတာ။ ဒီရောက်တော့လည်း အိမ်ဂရန်တွေ အခိုးခံလိုက်ရတာ။ အခု ကျမတို့ အိမ်ရောင်းတဲ့ လူတွေထဲကဘဲ ခိုးတာလား။ ဘာလားတော့ မသိရဘူး။ အဲဒါကြောင့် စာချုပ်အတုနဲ့ဘဲဖြစ်စေ၊ အစစ်နဲ့ဘဲဖြစ်စေ အိမ်တွေရောင်းရင် မဝယ်ကြပါနဲ့” လို့ ရွှေဖီမြေကို ပြောပါတယ်။
အိမ်အရောင်းတင်ခံရတာဟာ လားရှိုးမြို့ ပါရမီလမ်းသွယ် ၇ က ၂ ထပ်ခွဲ နေအိမ်ဖြစ်ပြီး ကာလပေါက်ဈေး သိန်း ၇ ထောင်နဲ့ ခိုးရောင်းသူ ရှိနေသလို တခြားရပ်ကွက်က နေအိမ်တွေလည်း အရောင်းတင်ခံနေရတယ်လို့ ဆိုပါတယ်။
လားရှိုးမြို့ထဲက အိမ် အရောင်းတင်ခံရတဲ့ အိမ်အပြင် ကျောက်မဲမြို့က နေအိမ်ရဲ့ အိမ်စာချုပ်တွေပါ ခိုးခံခဲ့ရတာကြောင့် ၎င်းစာချုပ်ထဲမှာ ဦးပန်းငြိမ်းနဲ့ ဒေါ်စန်းစန်းနီဆိုတဲ့ နာမည်ပါတဲ့ ပိုင်ဆိုင်မှု အရောင်း ပြခဲ့ရင် မဝယ်ကြဖို့ကိုလည်း မိသားစုဝင်က တောင်းဆိုထားပါတယ်။
လားရှိုးမြို့ထဲကနေ ကိုးကန့်တပ် ဆုတ်ခွာပြီး စစ်ကောင်စီတပ် ပြန်ဝင်လာမယ်ဆိုတဲ့ သတင်းကြောင့် လားရှိုးဒေသခံတချို့ နေအိမ်၊ ကားနဲ့ တခြားပိုင်ဆိုင်မှုတွေကို ဈေးပေါပေါနဲ့ ရောင်းနေကြတာရှိကြောင်း လားရှိုးဒေသခံတွေရဲ့ ပြောပြချက်အရ သိရပါတယ်။
