ရွှေဖီမြေ၊ မတ်လ ၆ ရက်၊ မိုင်းကိုင်
ပြီးခဲ့တဲ့ ဖေဖော်ဝါရီ ၂၈ ရက်က ရှမ်းတောင် မိုင်းကိုင်မြို့နယ် နောင်စံဖူးကျေးရွာအုပ်စု လွယ်ခွုင်ကျေးရွာ ဘုန်းကြီးကျောင်း မီးလောင်လို့ ကျောင်းထဲ ရှိနေတဲ့ ကိုရင်ငယ် ၄ ပါး ပျံလွန်တော်မူခဲ့တယ်လို့ ရွှေဖီမြေက စုံစမ်းသိရှိရပါတယ်။
မီးဟာ ဘုန်းကြီးကျောင်းရဲ့ မီးဖိုချောင်ထဲ လောင်ကျွမ်းခဲ့တာဖြစ်ပြီး အထဲမှာ အိပ်ပျော်နေတဲ့ ကိုရင်တွေ လောင်ကျွမ်းခဲ့တယ်လို့ ဖြစ်စဉ်သိရှိသူတစ်ဦးက ပြောပါတယ်။
“ကိုရင် ၄၊ ၅ ပါးက အဲထဲ အိပ်ပျော်နေတဲ့အချိန် ညဘက်မှာ မီးလောင်သွားတာ။ မီးက အရှိန်များတော့ ကိုရင်တွေ ပြန်မထွက်နိုင်ကြဘူး အကုန်ပါသွားတယ်။ တစ်ပါးကတော့ ဆေးရုံမှာ သေဆုံးသွားတယ်”
သေဆုံးသွားတဲ့ ကိုရင်လေးတွေဟာ အသက် ၁၀ နှစ်ခန့်သာ ရှိသေးပြီး ကျေးရွာက သူတို့ကို မီးသဂြိုလ်ပေးခဲ့ကြပြီး ဒဏ်ရာ ရရှိသူကတော့ ၁ ပါး ရှိတယ်လို့ ဆိုပါတယ်။
မီးလောင်ကျွမ်းမှုဟာ မီးဖိုကနေတဆင့် လောင်ကျွမ်းခဲ့တာ ဖြစ်နိုင်တယ်လို့ ဒေသခံတွေက ပြောဆိုပါတယ်။
နွေရာသီ ရောက်ရှိလာတော့မှာ ဖြစ်တာကြောင့် ဒေသခံတွေအနေနဲ့ မီး အထူးသတိထားကြဖို့ လူမှုကူညီရေးအသင်းနဲ့သက်ဆိုင်ရာတွေက သတိပေးနှိုးဆော်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
