မိုင်းရူပ၊ မေလ ၁၅ ရက်၊ နောင်ချို
တအာင်းတပ်မတော်- PSLF/TNLA ထိန်းချုပ်ထားတဲ့ ရှမ်းမြောက် နောင်ချိုမြို့နယ် သုံးဆယ်ရွာကို စစ်ကောင်စီတပ်က လေကြောင်းနဲ့ တိုက်ခိုက်ခဲ့ရာ ၅ ဦး ဒဏ်ရာ ရခဲ့တယ်လို့ နောင်ချိုဒေသခံတစ်ဦးက ရွှေဖီမြေကို ပြောပါတယ်။
မနေ့ မေလ ၁၄ ရက် နေ့လယ် ၃ နာရီ ၄၀ မိနစ်မှာ စစ်တပ်က သုံးဆယ်ကျေးရွာထဲ ဂျက်ဖိုက်တာ လေယာဉ်အသုံးပြုပြီး ပေါင် ၂၅၀ ဗုံး ၂ လုံး ကြဲချတိုက်ခိုက်ခဲ့ရာ အမျိုးသား ၅ ဦး ထိခိုက်ဒဏ်ရာ ရခဲ့ပါတယ်။
“သုံးဆယ်ရွာထဲကို ဂျက်ဖိုက်တာနဲ့ ၂ ကြိမ် လာကြဲတာ။ သေတဲ့သူတော့ မရှိတော့ဘူး။ အမျိုးသား ၅ ဦး ဒဏ်ရာ ရတယ်” လို့ နောင်ချိုဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ဗုံးကြဲတိုက်ခိုက်မှုကြောင့် နေအိမ်တချို့ ထိမှန်ပျက်စီးခဲ့ပြီး ဒဏ်ရာရသူတွေထဲ TNLA တပ်ဖွဲ့ဝင်လည်း ပါဝင်တယ်လို့ သူက ဆက်ပြောပါတယ်။
စစ်ကောင်စီရဲ့ အမြှောက်တပ် တည်ရှိရာ နောင်ချိုမြို့နယ် တောင်းခမ်းရွာအနီးဝန်းကျင်နဲ့ အုမ္မတီးရွာမှာတော့ စစ်တပ်နဲ့ TNLA အကြား နေ့စဉ်လိုလို တိုက်ပွဲ ဖြစ်ပွားနေပါတယ်။
ဧပြီလကုန်မှာ ပြုလုပ်ခဲ့တဲ့ တရုတ်နိုင်ငံ ကူမင်းဆွေးနွေးပွဲ မအောင်မြင်ပြီးနောက် စစ်တပ်ဟာ TNLA ထိန်းချုပ်ထားတဲ့ ကျောက်မဲ၊ မန်တုံ၊ မိုးကုတ်နဲ့ မိုင်းငေါ့ စတဲ့မြို့တွေကို လေကြောင်းနဲ့ ဗုံးကြဲတိုက်ခိုက်တာတွေ ပြုလုပ်နေပြီး အရပ်သားသေဆုံးမှု ဆက်ရှိနေပါတယ်။
ပြီးခဲ့တဲ့ မေလ ၁၃ ရက်မှာ TNLA ထိန်းချုပ်ထားတဲ့ နောင်ချိုနဲ့ မိုးကုတ်မြို့ထဲ ဂျက်လေယာဉ်နဲ့ ဗုံးကြဲတိုက်ခိုက်ခဲ့ရာ နေအိမ်တချို့ ထိမှန်ပျက်စီးခဲ့ပါတယ်။
စစ်တပ်ဟာ မေလကုန်အထိ အပစ်ရပ်ကြောင်း ထုတ်ပြန်ထားပေမဲ့ TNLA ထိန်းချုပ်ဒေသကို လေကြောင်း၊ လက်နက်ကြီးနဲ့ ဒရုန်းအသုံးပြုပြီး ပစ်ခတ်တိုက်တာတွေ ပြုလုပ်နေတာကြောင့် လူထုတွေအနေနဲ့ စစ်ရေးသတိ ရှိကြဖို့ TNLA က တိုက်တွန်းထားပါတယ်။
