မိုင်းရူပ၊ စက်တင်ဘာ ၁၀ ရက်၊ ကျောက်မဲ
စစ်ကောင်စီတပ်ရဲ့ ထိုးစစ်ဆင် တိုက်ခိုက်မှုကြောင့် ရှမ်းမြောက် ကျောက်မဲမြို့နယ် နောင်ပိန်ရွာအနီးဝန်းကျင်နဲ့ ဂုတ်တွင်းအနီးရှိ နောင်ပြစ်ရွာမှာ စစ်တပ်နဲ့ တအာင်းတပ်- TNLA တို့ တိုက်ပွဲ ဆက်လက် ပြင်းထန်နေတယ်လို့ ရှေ့တန်းစစ်မြေပြင်မှာ ရှိနေသူတွေက ရွှေဖီမြေကို ပြောပါတယ်။
နောင်ချို ဂုတ်တွင်းကနေ ထိုးစစ်ဆင်လာတဲ့ စစ်တပ်ဟာ ကျောက်မဲမြို့နယ်ဘက်ခြမ်း နောင်ပြစ်ရွာဘက် ထိုးစစ်ဆင် တိုက်ခိုက်နေပြီး နောင်ပြစ်ရွာရဲ့ နေရာအများစုကို စစ်တပ်က ပြန်ထိန်းချုပ်နိုင်ခဲ့ပြီလို့ သိရပါတယ်။
စစ်တပ်ရဲ့ ထိုးစစ်ဆင်မှုကြောင့် ၃ ပတ်ကျော် တိုက်ပွဲ ပြင်းထန်နေတဲ့ နောင်ပိန်ရွာမှာတော့ တိုက်ပွဲ ဆက်လက် ပြင်းထန်နေပြီး နှစ်ဖက် အထိအခိုက် အကျအဆုံး များတယ်လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
“တိုက်ပွဲကတော့ အပြန်အလှန် ထိုးစစ်ဆင်နေတဲ့ အခြေအနေပေါ့။ တိုက်ပွဲက ဆက်ပြင်းထန်နေတယ်။ နှစ်ဖက်အထိအခိုက်လည်း များတယ်”
နောင်ပိန်တိုက်ပွဲမှာ စစ်တပ်ဘက်က အသေခံဒရုန်းအပါအဝင် ဒရုန်းတိုက်ခိုက်မှုကို အဓိက အသုံးပြုပြီး တိုက်ခိုက်နေပါတယ်။
လက်ရှိမှာ ကျောက်မဲနဲ့ နောင်ချိုကို ဆက်သွယ်ထားတဲ့ ဂုတ်တွင်းတံတားကိုလည်း ပြန်လည် ပြုပြင်ပြီးစီးပြီလို့ စစ်ကောင်စီရဲ့ ဝါဒဖြန့် တယ်လီဂရမ်တွေမှာ ဖော်ပြနေတာ တွေ့ရပြီး နောင်ပိန်ရွာဘက် စစ်အင်အားနဲ့ လက်နက်ခဲယမ်း လွယ်လွယ်ကူကူ ပို့ဆောင်လို့ရမယ့် အခြေအနေ ဖြစ်နေတယ်လို့ ရှေ့တန်းမှာ ရှိနေသူတွေက ပြောပါတယ်။
ဩဂုတ် ၁၉ ရက်ကစပြီး အင်အား ရာချီရှိတဲ့ စစ်ကောင်စီ စစ်ကြောင်းဟာ နောင်ချိုကနေ ဂုတ်ထိပ်ချောင်းကိုဖြတ်ပြီး SSPP ထိန်းချုပ်ထားတဲ့ နောင်ပိန်ရွာအနီး ထန်းတပင်ရွာကနေ နောင်ပိန်ရွာဘက် ထိုးစစ်ဆင်လာတာပဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
