မိုင်းရူပ၊ သြဂုတ် ၂၃ ရက်၊ နောင်ချို
တအာင်းတပ်မတော် PSLF/TNLA ထိန်းချုပ်ထားတဲ့ နောင်ချိုမြို့ကို စစ်ကောင်စီတပ် ပြန်ရပြီးနောက် နောင်ချို-မိုးကုတ်လမ်းပိုင်းရှိ ကျေးရွာတွေမှာ စစ်တပ်ဘက်က ဆက်လက် ထိုးစစ်ဆင်နေပြီး လက်ရှိ ကျေးရွာ ၃ ခုမှာ တိုက်ပွဲပြင်းထန်နေတယ်လို့ ရှေ့တန်းစစ်မြေပြင်မှာ ရှိနေသူတွေက ပြောပါတယ်။
နောင်ချို-မိုးကုတ်လမ်းပေါ်ရှိ ချောင်းဆုံ၊ နာကြိုင်းနဲ့ ရတနာသင်္ဂိ စတဲ့ကျေးရွာတွေမှာ စစ်ကောင်စီတပ်နဲ့ TNLA တပ်အကြား တိုက်ပွဲ ပြင်းထန်နေတာဖြစ်ပါတယ်။
“စစ်တပ်ဘက်က အင်အား အများအပြား သုံးပြီး ထိုးစစ်လုပ်တာ။ ဒီရက်ပိုင်း ချောင်းဆုံ၊ ရတနာသင်္ဂိ၊ နာကြိုင်း ရွာကြားတွေမှာ တိုက်ပွဲ ပြင်းထန်နေတယ်” လို့ ရှေ့တန်းစစ်မြေပြင်မှာ စစ်ရှိသူတစ်ဦးက ရွှေဖီမြေကို ပြောပါတယ်။
စစ်တပ်စစ်ကြောင်းဟာ နောင်ချို-မိုးကုတ်လမ်းပေါ်ရှိ ကျေးရွာတွေကို ဆက်တိုက် ထိုးစစ်ဆင်နေတာဖြစ်ပြီး ဆမ္မဆယ်၊ သုံးဆယ်၊ ဟိုခိုနဲ့ ဒိုးပင် စတဲ့ ကျေးရွာကြီးတွေကိုလည်း ဆက်တိုက် သိမ်းယူနေပြီး ဒိုးပင်ရွာအကျော်က ကျေးရွာတွေကို ဆက်လက် ထိုးစစ်နေတာ ဖြစ်ပါတယ်။
ဒါ့အပြင် စစ်ကောင်စီတပ်ရဲ့ ထိုးစစ်ကြောင့် ကျောက်မဲမြို့နယ် နောင်ပိန်ရွာမှာလည်း စစ်ကောင်စီတပ်နဲ့ TNLA တပ်တို့အကြား တိုက်ပွဲ ပြင်းထန်နေတယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
