မိုင်းရူပ၊ မတ်လ ၇ ရက်၊ နောင်ချို
တအာင်းတပ်မတော်-TNLA ထိန်းချုပ်ထားတဲ့ ရှမ်းမြောက် နောင်ချိုမြို့နဲ့ မိုင် ၂၀ ခန့်ကွာဝေးတဲ့ တောင်ခမ်းကျေးရွာနဲ့ အုမ္မတီးကျေးရွာတွေဘက်မှာ စစ်ကောင်စီနဲ့ TNLA အကြား တိုက်ပွဲတွေ ဆက်ဖြစ်နေတယ်လို့ သိရပါတယ်။
ပြီးခဲ့တဲ့ ဖေဖော်ဝါရီလကစပြီး စစ်ကောင်စီတပ်ရဲ့ ထိုးစစ်ကြောင့် TNLA ထိန်းချုပ်ထားတဲ့ကာကင်းစခန်းအချို့ ပြန်လည်လက်လွတ်ခဲ့ရတာရှိခဲ့ပေမယ့် လက်ရှိမှာ တောင်ခမ်းရှိ စစ်ကောင်စီတပ်ဖွဲ့ကို TNLA က ဝိုင်းရံပိတ်ဆို့ထားဆဲဖြစ်တယ်လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
” မနေ့က TNLA က ထိုးစစ်တိုက်ခိုက်တော့ တိုက်ပွဲဖြစ်တာ ရှိတယ်။ လက်ရှိအခြေအနေက စစ်ကောင်စီရဲ့ တပ်စခန်းတွေကို ဝိုင်းရံပိတ်ဆို့ထားတဲ့ အခြေအနေ ဖြစ်တယ်။ ဒီနေ့မနက် မတ်လ ၇ ရက် အထိတော့ မြေပြင်တိုက်ပွဲတွေ ငြိမ်နေတယ်” လို့ ဆိုပါတယ်။
တောင်ခမ်းကျေးရွာမှာ စစ်ကောင်စီရဲ့ အမြောက်တပ်စခန်းကွပ်ကဲမှုဌာနချုပ်-အပါအဝင် အမြောက်တပ်တပ်စခန်းတွေ ဖြစ်တဲ့ -၃၅၄၊ ၂၀၆နဲ့ ၄၀၆ တပ်တွေ အခြေချ တပ်စွဲထားတာ ဖြစ်ပြီး တောင်ခမ်းမှာ စစ်ကောင်စီနဲ့ TNLA အကြား တိုက်ပွဲပြင်းထန်နေတာ ၆ လကြာရှိနေပြီ ဖြစ်ပါတယ်။
စစ်ကောင်စီထောက်ခံတဲ့ တယ်လီဂရမ်ချယ်နယ်တွေမှာတော့ တောင်ခမ်းရှိ TNLA တပ်စွဲထားတဲ့ မန်မော်ဘုရားကုန်း၊ ဆယ်တောင်ပြည့်ကုန်းနဲ့ လုံကုန်ဘုန်ကြီးကျောင်းတွေကို စစ်ကောင်စီဘက်က ပြန်လည်သိမ်းပိုက်နိုင်ခဲ့ကြောင်း ရေးသားဖော်ပြနေကြပါတယ်။
တောင်ခမ်းကျေးရွာဟာ နောင်ချိုနဲ့ ရှမ်းတောင် ကျောက်ဂူ-ရပ်စောက်ကို ဆက်သွယ်ထားတဲ့ လမ်းကြောင်းပေါ်မှာ တည်ရှိကာ စစ်ရေးအရ အရေးပါတဲ့နေရာဖြစ်ပြီး စစ်ကောင်စီတပ်ဘက်က တောင်ခမ်းလက်မလွတ်ရရေး အပြင်းအထန် ခုခံနေတယ်လို့ မြေပြင်အခြေအနေသိရှိသူတွေက ရွှေဖီမြေကို ပြောဆိုထားပါတယ်။
ဒါ့အပြင် နောင်ချိုနဲ့ ပြင်ဦးလွင်လမ်းမပေါ်မှာရှိတဲ့ အုမ္မတီးကျေးရွာမှာလည်း တိုက်ပွဲတွေဆက်လက်ဖြစ်ပွါးနေတာဖြစ်ပြီး စစ်ကောင်စီဘက်က ဒရုန်းတွေ အများအပြားအသုံးပြုပြီးတိုက်ခိုက်နေတယ်လို့ ဆိုပါတယ်။
နောင်ချိုမြို့ကိုတော့ ပြီးခဲ့တဲ့ ဇူလိုင် ၁၀ ရက်ကတည်းက TNLA နဲ့ ပူးပေါင်းတပ်တွေက တိုက်ခိုက်သိမ်းပိုက်နိုင်ခဲ့တာ ဖြစ်ပါတယ်။
