မိုင်းရူပ၊ မတ်လ ၁၁ ရက်၊ နောင်ချို
ရှမ်းမြောက် နောင်ချိုမြို့နယ် တောင်းခမ်းနဲ့ အုမ္မတီးကျေးရွာမှာ စစ်ကောင်စီတပ်နဲ့ တအာင်းတပ်မတော်- TNLA တို့အကြား တိုက်ပွဲ ဆက်ဖြစ်နေတယ်လို့ ရှေ့တန်းစစ်မြေပြင်မှာ ရှိနေသူတွေက ရွှေဖီမြေကို ပြောပါတယ်။
စစ်ကောင်စီရဲ့ အမြှောက်တပ်တွေ တည်ရှိရာ တောင်းခမ်းရွာနဲ့ နောင်ချို-ပြင်ဦးလွင်ကြားရှိ အုမ္မတီးရွာမှာ စစ်တပ်နဲ့ TNLA တို့အကြား ဒရုန်း၊ လက်နက်ကြီး အသုံးပြုကာ ပစ်ခတ်တိုက်ခိုက်နေပြီး နှစ်ဖက်အထိအခိုက် များနေတယ်လို့ သိရပါတယ်။
“တိုက်ပွဲက ဆက်ဖြစ်နေတယ်။ စစ်ကောင်စီက ဒရုန်းနဲ့ ဟောင်ဝစ်ဇာ လက်နက်ကြီးတွေသုံးပြီး တိုက်ခိုက်နေတာ ရှိတယ်။ တောင်းခမ်းမှာတော့ စစ်ကောင်စီကို TNLA က ဝိုင်းရံပိတ်ဆို့ထားဆဲ အခြေအနေပေါ့။ အုမ္မတီးဘက်က ဒီနေ့မှာ တစ်ဖက်နဲ့တစ်ဖက် ဒရုန်းနဲ့ တိုက်ခိုက်နေတယ်” လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီလကစပြီး စစ်တပ်ဘက်က ထိုးစစ်ဆင်မှုကြောင့် TNLA ထိန်းချုပ်ထားတဲ့ တောင်းခမ်းရွာက နေရာတချို့ ပြန်လည် လက်လွှတ်ခဲ့ရတာ ရှိနေပြီး စစ်ကောင်စီတပ်ဘက်က ဒရုန်း တိုက်ခိုက်မှု ပိုအားကောင်းလာတယ်လို့ ရှေ့တန်းစစ်မြေပြင်မှာ ရှိနေသူတွေက ပြောပါတယ်။
တောင်းခမ်းရွာမှာ စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ်အပါအဝင် အမြှောက်တပ်တပ်စခန်းတွေဖြစ်တဲ့ ၃၅၄၊ ၂၀၆ နဲ့ ၄၀၆ တပ်တွေ အခြေချ တပ်စွဲထားတာဖြစ်ပြီး တောင်းခမ်းမှာ စစ်တပ်နဲ့ TNLA တို့ တိုက်ပွဲ ပြင်းထန်နေတာ ၆ လကြာ ရှိနေပြီ ဖြစ်ပါတယ်။
စစ်ကောင်စီကို ထောက်ခံတဲ့ တယ်လီဂရမ်ချန်နယ်တွေမှာတော့ တောင်းခမ်းကို စစ်ကောင်စီက ပြန်လည် ထိန်းချုပ်နိုင်ခဲ့ပြီလို့ ရေးသားဖော်ပြနေကြပြီး တောင်းခမ်းကနေ နောက်တန်းသို့ ပြန်လာတဲ့ စစ်ကောင်စီတပ်ဖွဲ့ဝင်ကို စစ်ကောင်စီအရာရှိတွေ ကြိုဆိုနေတဲ့ပုံနဲ့ ရေးသားဖော်ပြနေတာ တွေ့ရပါတယ်။
နောင်ချိုမြို့ကိုတော့ ပြီးခဲ့တဲ့ ဇူလိုင် ၁၀ ရက်ကတည်းက TNLA နဲ့ ပူးပေါင်းတပ်က တိုက်ခိုက်သိမ်းပိုက်နိုင်ခဲ့တာဖြစ်ပြီး လက်ရှိ တိုက်ပွဲ ပြင်းထန်နေတဲ့ တောင်းခမ်းရွာက နောင်ချိုမြို့နဲ့ မိုင် ၂၀ ခန့်သာ ကွာဝေးတယ်လို့ သိရပါတယ်။
