မြတ်နိုး၊ အောက်တိုဘာ ၂ ရက်၊ ဗန်းမော်
ကချင်ပြည်နယ် ဗန်းမော်မြို့မှာ ပြီးခဲ့တဲ့ နှစ်ရက်ဆက်တိုက် တိုက်ပွဲ အပြင်းအထန် ဖြစ်ပွားနေပြီး KIA နဲ့ ပူးပေါင်းတပ်ဖွဲ့ ဆုတ်ခွာထားတဲ့ နေရာတစ်နေရာ ပြန်ရထားပြီဖြစ်ကြောင်း ရှေ့တန်းနဲ့ နီးစပ်သူတွေဆီက သိရပါတယ်။
“နှစ်ရက်ဆက်တိုက် ဗန်းမော်ဘက် တိုက်ပွဲ အရမ်း ပြင်းထန်တယ်။ ဘယ်နေရာတွေ ကြဲလဲ မသိဘူး။ ဗုံးကျသံ ကျယ်လွန်းလို့ မြေကြီးတောင် တုန်ခါတယ်” လို့ ဗန်းမော်အနီး စစ်ရှောင်အမျိုးသမီးတစ်ဦးက ပြောပါတယ်။
တိုက်လေယာဉ်တွေကလည်း နိမ့်နိမ့်လေး ပျံတာတွေ မြင်နေရပြီး စစ်ရှောင်နေရာကနေတောင် လေကြောင်း ဗုံးကြဲသံတွေ တဝုန်းဝုန်းနဲ့ ကြားနေရတယ်လို့ ဆိုပါတယ်။
စက်တင်ဘာ ၃၀ ရက်နဲ့ အောက်တိုဘာ ၁ ရက်မှာ တိုက်ပွဲ ပြင်းထန်ခဲ့ပြီးနောက် စစ်တပ် နေရာပြန်ယူထားတဲ့ တပ်စခန်းတချို့ KIA နဲ့ ပူးပေါင်းတပ်ဖွဲ့ ပြန်သိမ်းနိုင်ခဲ့တယ်လို့ ရှေ့တန်းနဲ့ နီးစပ်သူတစ်ဦးက ပြောပါတယ်။
“စက်တင်ဘာလ ၂၄ ရက်နေ့က ခွာထားရတဲ့ ၃ မိုင် ရွှေပြည်သာ KBC ဘုရားကျောင်းကုန်းကို အောက်တိုဘာလ ၁ ရက်နေ့ညက KIA နဲ့ ပူးပေါင်း တပ်ဖွဲ့ ပြန်လည် သိမ်းပိုက်လိုက်ပြီ” လို့ ရှေ့တန်းနဲ့ နီးစပ်သူတစ်ဦးက ပြောပါတယ်။
ပြီးခဲ့တဲ့ ရက်ပိုင်းက စစ်ကောင်စီရဲ့ ဗန်းမော် အမှတ်(၁၁) စစ်မြေပြင်ဆေးတပ်ရင်းနဲ့ အမှတ်(၅) ဆက်သွယ်ရေးတပ်ရင်းဘက်က စစ်ကြောင်း နှစ်ကြောင်းက ၆ ရက်လောက် စစ်ကြောင်း ထိုးလာခဲ့တာကြောင့် အဲဒီနေရာကနေ KIA နဲ့ ပူးပေါင်းတပ်ဖွဲ့တွေ ယာယီ ဆုတ်ခွာထားခဲ့တာလို့ ဆိုပါတယ်။
စစ်တပ်က ကားလမ်းမကြီးအတိုင်း ထိုးဖောက်ဖို့ ပြင်ဆင်နေပြီး လမ်းမကြီးအတိုင်း ထိုးစစ်ဆင်နေရာ နေ့တိုင်း တိုက်ပွဲ ဖြစ်ပွားကာ လေကြောင်းနဲ့ ဗုံးတရစပ် ကြဲချတိုက်ခိုက်လာတာကြောင့် ပြီးခဲ့တဲ့ ရက်ပိုင်းက KIA နဲ့ ပူးပေါင်းတပ်ဖွဲ့ဘက်က နေရာအတော်များများ ဆုတ်ခွာထားလိုက်ရတယ်လို့ ရှေ့တန်း သတင်းရင်းမြစ်တစ်ဦးကလည်း ပြောပါတယ်။
ဗန်းမော်မှာတော့ တပ်စခန်းတွေကို နှစ်ဖက်စလုံး ရလိုက်၊ ဆုတ်လိုက် အခြေအနေ ဖြစ်နေပြီး စစ်တပ်က ရေကြောင်းနဲ့ စစ်ကူ ပို့ဆောင်နိုင်တာကြောင့်လည်း တန်ပြန်ထိုးစစ်ဆင်လာတာလို့ သူက ပြောပါတယ်။
ဗန်းမော်ရှိ စစ်ကောင်စီတပ်စခန်းတွေကို ပြီးခဲ့တဲ့ ၂၀၂၄ ခုနှစ် နှစ်ကုန်ပိုင်းကစ KIA နဲ့ ပူးပေါင်း တော်လှန်ရေးတပ်ဖွဲ့တွေက ထိုးစစ်ဆင် တိုက်ခိုက်ခဲ့တာဖြစ်ပြီး စစ်ကောင်စီရဲ့ တပ်စခန်းတချို့ကို သိမ်းပိုက်ရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
