မိုင်းရူပ၊ မေလ ၂၃ ရက်၊ နောင်ချို
ရှမ်းမြောက် နောင်ချိုမြို့နယ်ထဲမှာ တအာင်းတပ်မတော်-TNLA နဲ့ စစ်ကောင်စီတပ်အကြား တိုက်ပွဲပြင်းထန်နေပြီး TNLA ထိန်းချုပ်ထားတဲ့ သရက်ချိုစေတီကုန်းကို စစ်ကောင်စီက ပြန်လည်ထိန်းချုပ်ခဲ့တယ်လို့ ရှေ့တန်းစစ်မြေပြင်မှာ ရှိနေသူတွေက ရွှေဖီမြေကို ပြောပါတယ်။
သရက်ချိုစေတီကုန်းကို ပြီးခဲ့တဲ့ မေလ ၂၀ ရက်မှာ စစ်ကောင်စီက ပြန်လည်သိမ်းပိုက်နိုင်ခဲ့ပြီး ဒီနေ့ မေလ ၂၃ ရက်မှာ သရက်ချိုစေတီကုန်းကို ပြန်ရဖို့ TNLA ဘက်က ထိုးစစ်ဆင်တိုက်ခိုက်နေပြီး တိုက်ပွဲပြင်းထန်နေတယ်လို့ ဆိုပါတယ်။
” မနက် ၁၀ နာရီကတည်းကစပြီး တိုက်ပွဲပြင်းထန်နေတယ်။ သရက်ချိုကုန်းကို ပြန်ရဖို့ TNLA က ထိုးစစ်ပြန်လုပ်တာ” လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
စစ်ကောင်စီကို ထောက်ခံတဲ့ တယ်လီဂရမ်ချန်နယ်တွေမှာတော့ သရက်ချိုစေတီကုန်းကို စစ်ကောင်စီတပ်ဘက်က သိမ်းပိုက်နိုင်ခဲ့ပြီး TNLA ရဲ့ တပ်ဖွဲ့ဝင်အလောင်း ၁ လောင်းနဲ့ လက်နက်ခဲယမ်းတွေ သိမ်းဆည်းရမိကြောင်း ရေးသားဖော်ပြနေကြပါတယ်။
သရက်ချိုကျေးရွာဟာ စစ်ကောင်စီရဲ့ အမြှောက်တပ်တွေတည်ရှိရာ တောင်းခမ်းကျေးရွာနဲ့ TNLA ထိန်းချုပ်ထားတဲ့ နောင်ချိုမြို့ရဲ့ ကြားမှာတည်ရှိတာ ဖြစ်ပါတယ်။
စစ်ကောင်စီတပ်ဟာ ၎င်းတို့လက်လွှတ်ထားရတဲ့ နောင်ချိုမြို့ကို ပြန်ရဖို့ပြီးခဲ့တဲ့ ဖေဖော်ဝါရီလကစပြီး တောင်းခမ်းနဲ့ အုမ္မတီးဘက်ကနေ ထိုးစစ်ဆင်တိုက်ခိုက်နေပြီး တအာင်းတပ်ဘက်က ၎င်းတို့ထိန်းချုပ်ထားတဲ့ နေရာအချို့ လက်လွတ်ခဲ့ရတာတွေ ရှိခဲ့ပါတယ်။
မနေ့ မေလ ၂၂ ရက်မှာလည်း ရှမ်းမြောက် နောင်ချိုမြို့နယ် အုမ္မတီးလမ်းခွဲမှာ စစ်ကောင်စီတပ်က ဂျက်လေယာဥ်နဲ့ ဗုံး ၄ လုံးကြဲချတိုက်ခိုက်ခဲ့တယ်လို့ တအာင်းတပ်က ထုတ်ပြန်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
