မိုင်းရူပ၊ ဧပြီ ၂၇ ရက်၊ နောင်ချို
စစ်ကောင်စီတပ်ဘက်က ထိုးစစ်ဆင်တိုက်ခိုက်နေတာကြောင့် ရှမ်းမြောက် နောင်ချိုမြို့နယ်နဲ့ မန္တလေးတိုင်း သပိတ်ကျင်းမြို့နယ်မှာ စစ်ကောင်စီနဲ့ တအာင်းတပ်မတော်-TNLA အကြား တိုက်ပွဲတွေဆက်လက်ပြင်းထန်နေတယ်လို့ ရှေ့တန်းသတင်းအရင်းအမြစ်တွေက ရွှေဖီမြေကို ပြောပါတယ်။
စစ်ကောင်စီတပ်ဟာ ၎င်းတို့လက်လွတ်ခဲ့ရတဲ့ နောင်ချိုမြို့ကို တောင်းခမ်းစစ်မျက်နှာကနေ ထိုးစစ်ဆင်တိုက်ခိုက်နေပြီး လက်ရှိမှာ နောင်ချိုမြို့နဲ့ ၁၀ မိုင်ကျော်သာ ကွာဝေးတဲ့ နောင်လင်ကျေးရွာအထိ စစ်ကောင်စီတွေရောက်လာပြီး နောင်လင်ရွာမှာ တိုက်ပွဲပြင်းထန်နေပါတယ်။
” ဒီနေ့က နောင်လင်ရွာထဲမှ တိုက်ပွဲတွေ ပြင်းထန်နေတယ်။ စစ်ကောင်စီတပ်က ထိုးလာနေတာ။ ဒီနေ့ အမြောက်တပ် ၃၅၄ ကနေ TNLA ရှိတဲ့နေရာကို ဒရုန်းနဲ့ အဆိပ်ငွေ့လာကြဲတာရှိတယ်”
စစ်ကောင်စီတပ်ဟာ ၎င်းလက်လွတ်ထားရတဲ့ နောင်ချိုမြို့ကို ပြန်ထိန်းချုပ်နိုင်ဖို့ အုမ္မတီးကနေ ထိုးစစ်ဆင်တိုက်ခိုက်နေသလို တောင်ဂခမ်းကနေလည်း ထိုးစစ်ဆင်တိုက်ခိုက်နေပါတယ်။
သပိတ်ကျင်းမြို့နယ် ၉ မိုင်မှာလည်း စစ်ကောင်စီဘက်က ထိုးစစ်ဆင်တိုက်ခိုက်နေတာကြောင့် စစ်ကောင်စီနဲ့ TNLA၊ ပူးပေါင်းတပ်တွေအကြား ဒီနေ့ ဧပြီ ၂၇ ရက်မှာ တိုက်ပွဲတွေ ပြင်းထန်နေပါတယ်။
TNLA ပါဝင်တဲ့ ညီနောင်မဟာမိတ် ၃ ဖွဲ့က ဧပြီလတစ်လလုံး အပစ်ရပ်ကြောင်း ထုတ်ပြန်ထားသလို စစ်ကောင်စီတပ်ကလည်း ဧပြီလကုန်အထိ အပစ်ရပ်မယ်လို့ ကြေညာထားပေမယ့် လေကြောင်းနဲ့တိုက်ခိုက်တာ ထိုးစစ်ဆင်တာတွေ ဆက်တိုက်လုပ်ဆောင်နေပါတယ်။
