လွေးပို့ဆပေ၊ ဇန်နဝါရီ ၈ ရက်၊ မူဆယ်
စစ်ကောင်စီတပ် ထိန်းချုပ်တဲ့ မူဆယ်မြို့နဲ့ တအာင်းတပ်- TNLA ထိန်းချုပ်ထားတဲ့ နမ့်ခမ်းမြို့မှာ စက်သုံးဆီဈေး မြှင့်တက်မှုကြောင့် တရုတ်ထုတ်ဆိုင်ကယ် ဘက်ထရီဘီး ပိုမိုအသုံးပြုလာကြတယ်လို့ ဒေသခံတွေက ပြောပါတယ်။
စက်သုံးဆီ အဆမတန် ဈေးမြှင့်တက်လာတာကြောင့် စက်သုံးဆီ မလိုအပ်တဲ့ ဘက်ထရီဆိုင်ကယ်တွေကို ပိုအသုံးပြုလာကြတာလို့ မူဆယ်မြို့ခံ အမျိုးသားတစ်ဦးက ပြောပါတယ်။
“ဓာတ်ဆီဈေး အရမ်းတက်လို့ သူများက ဘက်ထရီဘီးဘဲ အသုံးပြုလာတာ များတယ်။ ဆီဈေးအတွက် မနိုင်ကြဘူး။ သူက ဘက်ထရီခြောက်လေ။ ဓာတ်ဆီ မလိုဘူး။ လျှပ်စစ်မီးနဲ့ သွင်းရတာ။ ဘက်ထရီနဲ့ပဲ ဓာတ်ဆီ မစားဘူး။ အဲကြောင့် ဒီနောက်ပိုင်း ပိုသုံးလာတာ”
ဓာတ်ဆီ မလိုတဲ့အပြင် အားအပြည့် တစ်ခါသွင်းထားရင် သုံးလေးရက် အသုံးပြုလို့ ရတာကြောင့် ဘက်ထရီဆိုင်ကယ်ကို ပိုပြီးဝယ်စီးလာကြတာဖြစ်တယ်လို့ သူက ဆိုပါတယ်။
နမ့်ခမ်းမှာ နေထိုင်တဲ့ အမျိုးသားတစ်ဦးကလည်း “အဓိကတော့ ဓာတ်ဆီပါပဲ။ အရင်က အဲဆိုင်ကယ်တွေ မစီးဘူးလားဆိုရင် စီးတယ်။ ဒါပေမဲ့ ဒီနောက်ပိုင်းက အရမ်းစီးလာတယ်။ သူက ဓာတ်ဆီမလို အားနဲ့ပဲဆိုတော့ အဆင်ပြေတယ်” ဆိုပြီး ပြောပါတယ်။
တရုတ်ထုတ် ဘက်ထရီဆိုင်ကယ်တွေက ဈေးအမျိုးမျိုးရှိပြီး တစ်စီးကို တရုတ်ယွမ်ငွေ ၂ ထောင်ကနေ ၅ ထောင်ဝန်းကျင် (သိန်း ၃၀ ကျော်)အထိ ရှိတယ်လို့ သိရပါတယ်။
မြန်မာ-တရုတ်နယ်စပ်ဖြစ်တဲ့ မူဆယ်မြို့မှာ တရုတ်အာဏာပိုင်တွေက စက်သုံးစီနဲ့ စားသောက်ကုန် သယ်ယူခွင့် ပိတ်ပင်လိုက်ပြီးနောက် စက်သုံးစီဈေးနှုန်း အဆမတန် မြှင့်တက်လာပြီး လက်ရှိ မူဆယ်နဲ့ နမ့်ခမ်းမှာ ဓာတ်ဆီ တစ်လီတာကို ၈ ထောင်ကနေ ၁ သောင်းဝန်းကျင် ရှိတယ်လို့ ဒေသခံတွေက ပြောပါတယ်။
