လွေးထွေး၊ ဇန်နဝါရီ ၁၅ ရက်၊ ပြင်ဦးလွင်
မန္တလေးတိုင်း ပြင်ဦးလွင်မြို့မှာ စစ်ကောင်စီတပ်မှ ထိပ်ပိုင်းခေါင်းဆောင်တစ်ဦးလို့ ယူဆရသူ ရောက်နေတာကြောင့် မြို့လုံခြုံရေး ပုံမှန်ထက် တင်းကြပ်ထားတယ်လို့ ဖြစ်စဉ်သိရှိသူ အမျိုးသားတစ်ဦးရဲ့ ပြောပြချက်အရ သိရပါတယ်။
ဇန်နဝါရီ ၁၁ ရက် မနက် ၉ နာရီခန့်မှာ ရဟတ်ယာဉ်နဲ့ စစ်သင်တန်းကျောင်းရှိတဲ့ ပြင်ဦးလွင်မြို့သို့ ရောက်လာတာကြောင့် မြို့အဝင်အထွက်မှာ သွားလာတဲ့ လူထုတွေကို နေ့ရောညပါ စစ်ဆေးမေးမြန်းခဲ့တာပဲ ဖြစ်ပါတယ်။
ဇန်နဝါရီ ၁၃ ရက်ကလည်း ပြင်ဦးလွင်နဲ့ နောင်ချိုဘက်အထွက် စစ်ဆေးရေးဂိတ်မှာ ဆိုင်ကယ်နဲ့ သွားလာတဲ့ အသက် ၂၀ ဝန်းကျင်အရွယ် လူငယ်အမျိုးသားတွေကို ဖမ်းဆီးစစ်ဆေးခဲ့ပါတယ်။
ဖြစ်စဉ်သိရှိသူ အမျိုးသားတစ်ဦးက “မေမြို့ ခံစစ် မဟုတ်ရင် တိုက်စစ်အတွက် ကွပ်ကဲဖို့ လာတယ်လို့ပြောတယ်။ ဖြစ်နိုင်ခြေက ခံစစ်အတွက် ဖြစ်နိုင်ခြေ များတယ်။ စီစဉ်စရာရှိတာ စီစဉ်ပြီးရင် ပြန်မယ်လို့ ကြားထားတယ်” လို့ ရွှေဖီမြေကို ပြောပါတယ်။
စစ်တပ်က ဖမ်းဆီးစစ်ဆေးခဲ့တဲ့ လူငယ်အမျိုးသားတွေဟာ အများအားဖြင့် ကျေးရွာပိုင်းမှ လူငယ်သာဖြစ်ပြီး မနေ့ ဇန်နဝါရီ ၁၄ ရက်အထိ ပြန်လွှတ်လာတာ မတွေ့ရသေးကြောင်း ၎င်းက ဆက်ပြောပါတယ်။
အလားတူ ပြီးခဲ့တဲ့ ဒီဇင်ဘာ ပထမအပတ်ကလည်း ပြင်ဦးလွင်မြို့မှ စစ်ကောင်စီရဲ့ စစ်တက္ကသိုလ် DSA ကျောင်းဆင်းပွဲသို့ စစ်ခေါင်းဆောင် မင်းအောင်လှိုင် ရောက်လာတာကြောင့် မြို့အဝင်အထွက် လုံခြုံရေး တင်းကြပ်ခဲ့ဖူးပါတယ်။
ဒါ့အပြင် စစ်တပ်က တပ်စွဲထားတဲ့ ပြင်ဦးလွင်မြို့အနီးရှိ ဝက်ဝံဂိတ်မှာလည်း သွားလာတဲ့ လူထုတွေကို စစ်ဆေးမေးမြန်းခဲ့သလို ငွေတောင်းတာလည်း လုပ်နေတယ်လို့ ဒေသခံတွေက ရွှေဖီမြေသို့ ပြောဆိုထားဖူးပါတယ်။
