လွေးထွေး၊ ဧပြီ ၁၂ ရက်၊ ရွာငံ
ရှမ်းတောင် ရွာငံ-အောင်ပန်း လမ်းမပေါ်မှာ ဓနုပြည်နယ် ကာကွယ်ရေးတပ်တော်- DSNDA က စစ်ဆေးရေး လုပ်နေချိန် ကားပေါ်ကနေ ဆင်းပြေးသွားတဲ့ စစ်ကောင်စီတပ်ရဲ့ ဗိုလ်ကြီးအဆင့်ရှိသူကို အသေပစ်ခတ်ဖမ်းဆီးရမိခဲ့ကြောင်း DSNDA ရဲ့ သတင်းနဲ့ပြန်ကြားရေးတာဝန်ခံ ကိုကျားပျံရဲ့ ပြောပြချက်အရ သိရပါတယ်။
မနေ့ ဧပြီ ၁၁ ရက် မနက် ၆ နာရီခွဲမှာ DSNDA က စစ်ဆေးရေး လုပ်နေချိန် မသင်္ကာတာကြောင့် ကားပေါ်က ဆင်းခိုင်းချိန်မှာ ထွက်ပြေးဖို့လုပ်တဲ့ စစ်ကောင်စီရဲ့ ဗိုလ်ကြီးတစ်ဦးကို ပစ်ခတ်ခဲ့တာ ဖြစ်ပါတယ်။
ကိုကျားပျံက “စစ်ဆေးနေတာကို ထွက်ပြေးလို့ ပစ်လိုက်တာ သေသွားမှ ပြန်စစ်ကြည့်တော့ ဗိုလ်ကြီး ဖြစ်နေတာ။ သူတစ်ယောက်တည်းဘဲ။ တခြားတပ်သားတွေလည်း မပါဘူး” လို့ ပြောပါတယ်။
သေဆုံးသူ ဗိုလ်ကြီးထံမှ ပစ္စတိုတစ်လက်၊ လက်ပစ်ဗုံးတစ်လုံး၊ ဖုန်းနဲ့ ငွေသားတွေလည်း သိမ်းဆည်းရမိခဲ့တယ်လို့ ဆိုပါတယ်။
သိမ်းဆည်းရရှိတဲ့ အချက်လက်နဲ့ မြေပြင်သတင်းအချက်အလက်အရ သူဟာ ဗိုလ်ကြီးအဆင့်ရှိသူ မျိုးဇော်သန်းဖြစ်ပြီး ရွာငံမြောက်ဖက် မြို့ရဲ့ အထွက်ဂိတ်မှာ အာဏာအရှိဆုံးဖြစ်ကြောင်း ပြောဆိုထားပါတယ်။
