မိုင်းရူပ၊ နိုဝင်ဘာ ၁ဝ ရက်၊ ရွာငံ
ရှမ်းတောင် ဓနုဒေသ ရွာငံမြို့နယ်မှာ အခြေစိုက်တဲ့ တော်လှန်ရေးတပ်ဖြစ်တဲ့ ချိုးဖြူ တော်လှန်ရေးတပ် (ရွာငံ PDF)- JPRF က ဓနုပြည်သူ့လွတ်မြောက်ရေး တပ်တော်- DPLA ထံ ပူးပေါင်းလိုက်ကြောင်း ချိုးဖြူတပ်ဖွဲ့က ထုတ်ပြန်လာပါတယ်။
ချိုးဖြူတပ်ဖွဲ့အနေနဲ့ ၂၀၂၂ ခုနှစ်ကစပြီး နေရာဒေသမျိုးစုံမှာ စစ်ကောင်စီတပ်ကို တော်လှန်နေပြီး တော်လှန်ရေးအရွေ့တစ်ခု အမြန်ဖြစ်ဖို့ ရည်ရွယ်တာကြောင့် DPLA နဲ့ ပူးပေါင်းသွားမယ်လို့ ပြီးခဲ့တဲ့ နိုဝင်ဘာ ၈ ရက်က ထုတ်ပြန်တဲ့ ထုတ်ပြန်ချက်ထဲ ဖော်ပြထားပါတယ်။
ရှေ့ဆက်ပြီး DPLF/DPLA နာမည်နဲ့ စစ်သုံးစစ် အမြစ်ပြတ် ချေမှုန်းရေးနဲ့ အဖိနှိပ်ခံ လူထုတွေ လွတ်မြောက်ရေးအတွက် ဆက်လက် တိုက်ပွဲ ဝင်သွားမယ်လို့ ဆိုပါတယ်။
DPLA ရဲ့ဥက္ကဋ္ဌ ဦးထွန်းထွန်းနိုင်ကတော့ DPLA နဲ့ ချိုးဖြူတပ်ဖွဲ့ဟာ အရင်ကတည်းက မဟာမိတ်အနေနဲ့ ပူးပေါင်းလာတာဖြစ်ပြီး အခုလို ပူးပေါင်းလိုက်တာဟာ စည်းလုံးမှုကို ပြသတာဖြစ်သလို တော်လှန်ရေးကို ပိုအားကောင်းစေတယ်လို့ ရွှေဖီမြေကို ပြောပါတယ်။
“အခုအချိန်မှာ အားလုံး စုစုစည်းစည်း ပူးပေါင်းဆောင်ရွက်နိုင်ကြရင်တော့ အားလုံးအတွက် အကောင်းဆုံးရလဒ်က ကျိန်းသေ ထွက်လာမှာပါ”
ချိုးဖြူတပ်ဖွဲ့ဟာ ရှမ်းတောင် ရွာငံမြို့နယ်မှာ အခြေစိုက်ပြီး ရွာငံမြို့နယ်အပါအဝင် ကရင်နီပြည်ရှိ တော်လှန်ရေးတပ်တွေနဲ့လည်း ပူးပေါင်းကာ တိုက်ပွဲ ဝင်ခဲ့ပါတယ်။
DPLA တပ်ကတော့ ရှမ်းမြောက်မှာ တအာင်းတပ်- TNLA နဲ့အတူ ပူးပေါင်းတိုက်ပွဲဝင်ခဲ့ပြီး ရှမ်းတောင်ရှိ ဓနုလူမျိုးတွေ အများဆုံး နေထိုင်တဲ့ ပင်းတယ၊ ရွာငံ၊ ရပ်စောက် စတဲ့မြို့နယ်မှာ အခြေချ လှုပ်ရှားနိုင်ဖို့ ကြိုးစားနေတာပဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
