မိုင်းရူပ၊ သြဂုတ် ၃ ရက်၊ နောင်ချို
TNLA ထိန်းချုပ်ဒေသကို စစ်တပ်ဘက်က ထိုးစစ်ဆင် တိုက်ခိုက်နေတာကြောင့် နောင်ချိုမြို့နယ်နဲ့ မိုးကုတ်မြို့နယ်ကြားရှိ လွယ်ငင်းကျေးရွာမှာ တိုက်ပွဲဖြစ်ပွားနေတယ်လို့ မြေပြင်သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
စစ်ကောင်စီတပ်ဟာ နောင်ချို-မိုးကုတ်လမ်းပေါ်ရှိ သုံးဆယ်၊ ရွှေကြာအင်းကျေးရွာတွေကို ထိန်းချုပ်နိုင်ခဲ့ပြီးနောက် တော်မွန်နဲ့ လွယ်ငင်းကျေးရွာဘက်ကို ဆက်လက်ထိုးစစ်ဆင်လာနေတာ ဖြစ်ပါတယ်။
“တိုက်ပွဲက နောင်ချို-မိုးကုတ်လမ်းပိုင်းမှာ တိုက်ပွဲဖြစ်နေတာ ဟုတ်တယ်။ ဒီနေ့က လွယ်ငင်းရွာမှာ ဖြစ်နေတာ” လို့ မြေပြင်သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
စစ်ကောင်စီတပ်ဘက်က နောင်ချိုမြို့ကို ပြန်ထိန်းချုပ်ပြီး နောင်ချို- မိုးကုတ်လမ်းပေါ်ရှိ ကျေးရွာတွေကို ဆက်လက်ထိုးစစ်ဆင်နေဖြစ်ပြီး TNLA ဘက်က ကျေးရွာတချို့ကို ပြန်လည်လက်လွှတ်ခဲ့ရတာတွေ ရှိနေပါတယ်။
စစ်ကောင်စီတပ်ထောက်ခံတဲ့ တယ်လီဂရမ်ချယ်နယ်တွေမှာလည်း တော်မွန်ရွာအနီးရှိ TNLA ရဲ့ စခန်းကုန်းကို မနေ့ သြဂုတ် ၂ ရက်မှာ စစ်တပ်ဘက်က သိမ်းပိုက်နိုင်ခဲ့တယ်လို့ ရေးသားဖော်ပြနေကြပါတယ်။
TNLA တပ်ဘက်ကတော့ နောင်ချို-မိုးကုတ်လမ်းမှာ ဖြစ်ပွားနေတဲ့ တိုက်ပွဲတွေနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
TNLA နဲ့ ပူးပေါင်းတပ်တွေ ထိန်းချုပ်ထားတဲ့ နောင်ချိုမြို့ကို ၁ နှစ်ကျော်အကြာ ပြီးခဲ့တဲ့ ဇူလိုင် ၁၆ ရက်မှာ စစ်တပ်ထံ ပြန်လည်လက်လွှတ်ခဲ့ရတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
