ရွှေဖီမြေ၊ ဧပြီ ၁၉ ရက်၊ လားရှိုး
မနေ့ ဧပြီ ၁၈ ရက်က စစ်ကောင်စီကိုယ်စားလှယ်တွေကို တရုတ်နိုင်ငံခြားရေးဝန်ကြီးဌာနရဲ့ အာရှရေးရာ အထူးကိုယ်စားလှယ် တိန်ရှီကျွင်းကိုယ်တိုင်ဦးဆောင်ပြီး လားရှိုးမြို့ထဲ ရောက်ရှိလာပြီးတော့ ကိုးကန့်တပ်ဆီကနေ လားရှိုးမြို့ လွှဲပြောင်းရယူရေး ကိုယ်တိုင် ဆောင်ရွက်ပေးနေတယ်လို့ အခြေနေသိရှိတဲ့ လားရှိုးမြို့ရှိ သတင်းအရင်းမြစ်တွေဆီက သိရပါတယ်။
တိန်ရှီကျွင်းကိုယ်တိုင် ရောက်ရှိနေတာကြောင့် လုံခြုံရေးကို ကိုးကန့်တပ်က အထူးကြပ်မတ်ကာ လုပ်ဆောင်နေရတယ်လို့လည်း ဆိုပါတယ်။
“လားရှိုးမြို့ကို စကစထံ လွှဲပြောင်းရေးကို တိန်ရှီကျွင်းကိုယ်တိုင်က တာဝန်ယူ လုပ်ပေးသွားမှာဖြစ်မယ်။ ဝင်လာတုန်းကလည်း သူကိုယ်တိုင် ဦးဆောင်တာ။ အဲဒါကြောင့် လုံခြုံရေး ကိုးကန့်တပ်တွေ ခဏတင်းကြပ် လမ်းတွေ ပိတ်ထားရတာ”
အဆိုပါကိစ္စနဲ့ပတ်သက်ပြီး ကိုးကန့်တပ်ဆီကနေတော့ သီးခြား အတည်ပြုချက် မရသေးပါဘူး။
စစ်ကောင်စီထံ လားရှိုးမြို့ကို လာမယ့် ဧပြီ ၂၁ ရက်မှာ နောက်ဆုံးထား လွှဲပြောင်းပေးသွားမယ်လို့ သတင်း ထွက်ပေါ်နေပေမဲ့ ရွှေဖီမြေအနေနဲ့ သီးခြား အတည်မပြုနိုင်သေးပါဘူး။
လက်ရှိမှာတော့ လားရှိုးမြို့ပတ်ပတ်လည်မှာတော့ ကိုးကန့်တပ် လုံခြုံရေး ယူထားဆဲဖြစ်ပြီး မြို့ထဲမှာတော့ အခြေအနေ တည်ငြိမ်နေတယ်လို့ ဒေသခံတွေက ပြောဆိုပါတယ်။
လားရှိုးကိစ္စနဲ့ပတ်သက်ပြီး စစ်ကောင်စီနဲ့ ကိုးကန့်တပ်ဘက်ကတော့ တရားဝင် ထုတ်ပြန်တာ မရှိသေးပါဘူး။
