လွေးလာဝ်ဇာရ်၊ ဇွန်လ ၉ ရက်၊ နမ့်ခမ်း
တအာင်းတပ်မတော် ထိန်းချုပ်ထားတဲ့ နမ့်ခမ်းမြို့နယ် ပန်ယုတ်ကျေးရွာမှာ သစ်ပင်လဲကာ ပိမိရာကနေ ၄ နှစ်အရွယ် ကလေး ၁ ဦး သေဆုံးပြီး ကလေး ၁ ဦးအပါအဝင် ၃ ဦး ဒဏ်ရာ ရခဲ့တယ်လို့ ရွာခံတစ်ဦးက ရွှေဖီမြေကို ပြောပါတယ်။
ဒီနေ့ ဇွန်လ ၉ ရက် မနက် ၈ နာရီဝန်းကျင်မှာ သစ်ပင်လဲကျခဲ့တာဖြစ်ပြီး ၄ နှစ်အရွယ် အမွှာကလေးငယ် ၂ ဦး ထိခိုက်ခဲ့ရာ တစ်ဦးကတော့ သေဆုံးသွားကြောင်း သိရပါတယ်။
ဒါ့အပြင် အသက် ၄၀ ကျော်အရွယ် အမျိုးသမီး ၂ ဦးလည်း သစ်ပင် လဲကျမှုကြောင့် ထိခိုက်ဒဏ်ရာ ရရှိခဲ့တယ်လို့ ဆိုပါတယ်။
ရွာခံအမျိုးသားတစ်ဦးက “သူတို့အိမ်ဘေးက သစ်ပင် လဲကျတာ။ သူတို့အိမ်ပေါ်ကို လဲကျတော့ အမွှာနှစ်ယောက်ထိတာ။ မိန်းကလေးက သေသွားတယ်။ နမ့်ခမ်း ဆေးရုံသွားတာ မနိုင်လို့ဆိုပြီး မူဆယ် သွားခိုင်းတာ။ လမ်းတစ်ဝက်ရောက်တော့ သူအသက်မရှိတော့ဘူး။ ယောက်ျားလေးကတော့ မသေဘူး။ နောက်အမျိုးသမီး နှစ်ယောက်လည်း ဒဏ်ရာဘဲ ရတာ” လို့ ပြောပါတယ်။
သစ်ပင် လဲကျမှုကြောင့် ဒဏ်ရာရရှိခဲ့သူတွေကို နမ့်ခမ်းဆေးရုံသို့ ပို့ဆောင်ထားပြီး လက်ရှိမှာ ဆေးကုသမှု ခံယူနေကြတယ်လို့ အထက်ပါ အမျိုးသားက ပြောပါတယ်။
ဒီရက်ပိုင်းမှာ ရှမ်းမြောက်အပြင် ရှမ်းတောင် တောင်ကြီး၊ ညောင်ရွှေမြို့မှာလည်း မိုးသည်းထန်စွာ ရွာသွန်းမှုကြောင့် ရေကြီးရေလျှံမှု ဖြစ်ပွားနေပါတယ်။
ဒါ့အပြင် မနေ့ ဇွန်လ ၈ ရက်မှာလည်း တန့်ယန်းမြို့ ရပ်ကွက် ၆ မှာ မြေပြိုမှု ဖြစ်ပွားခဲ့ပြီး အသက် ၄၉ နှစ်အရွယ် အမျိုးသမီးတစ်ဦး မြေပိပြီးတော့ သေဆုံးသွားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
