မိုင်းရူပ၊ ဧပြီ ၆ ရက်၊ နောင်ချို
အပစ်ရပ်ထားတဲ့ စစ်ကောင်စီတပ်က TNLA ထိန်းချုပ်ထားတဲ့ ရှမ်းမြောက် နောင်ချိုမြို့နယ်ထဲ လေယာဥ်နဲ့ ဆက်လက် ဗုံးကြဲတိုက်ခိုက်နေတယ်လို့ ဒေသခံတွေက ရွှေဖီမြေကို ပြောပါတယ်။
မနေ့ ဧပြီ ၅ ရက် ည ၁၀ နာရီ ၁၁ မိနစ်မှာ နောင်ချိုမြို့နယ် နောင်လင်နဲ့ နမ့်ဆောင်ဟူးကျေးရွာထဲ ဂျက်ဖိုက်တာ လေယာဥ်နဲ့ ပေါင် ၂၅၀ ဗုံး ကြဲချတိုက်ခိုက်ခဲ့ရာ နေအိမ် ၄ လုံး ပျက်စီးခဲ့တယ်လို့ ဆိုပါတယ်။
“၁၀ နာရီ ၁၁ မိနစ်မှာ ၁ လုံး ကြဲပြီး ၁၀ နာရီ ၁၅ မိနစ်မှာ နောက်တစ်လုံး ပြန်ကြဲတယ်။ လူအထိအခိုက်တော့ မရှိဘူး။ အိမ်တွေပဲ ပျက်တာ” လို့ နောင်ချိုဒေသခံတစ်ဦးက ရွှေဖီမြေကို ပြောပါတယ်။
နောင်ချို့မြို့နယ်မှာ စစ်တပ်ရဲ့ အဆက်မပြတ် ဗုံးကြဲတိုက်ခိုက်မှုကြောင့် ဒေသခံတွေဟာ ဘေးလွတ်ရာ ထွက်ပြေး တိမ်းရှောင်နေကြပါတယ်။
ပြီးခဲ့တဲ့ ဧပြီ ၁ ရက်မှာလည်း TNLA ထိန်းချုပ်ထားတဲ့ နောင်ချိုမြို့နယ် လွယ်ခွင်ရွာကို ဂျက်လေယာဥ်နဲ့ ဗုံး ၂ ကြိမ် ကြဲချတိုက်ခိုက်ခဲ့ရာ ၅ ဦး ဒဏ်ရာ ရခဲ့ပါတယ်။
နောင်ချိုမြို့နယ် တောင်းခမ်းရွာမှာ စစ်တပ်ဘက်က စစ်အင်အား ဖြည့်တင်းပြီးနောက် ဧပြီ ၄ ရက်ကစပြီး TNLA တည်ရှိရာကို ထိုးစစ်ဆင် တိုက်ခိုက်နေပြီး တိုက်ပွဲ ဆက်လက် ဖြစ်ပွားနေပါတယ်။
ငလျင်သင့်တဲ့ လူထုတွေကို စာနာတဲ့အနေနဲ့ ပြန်လည်ထူထောင်ရေး ပြုလုပ်နိုင်ဖို့ TNLA ပါဝင်တဲ့ ညီနောင်မဟာမိတ် ၃ ဖွဲ့က ဧပြီလ တစ်လလုံး အပစ်ရပ်ကြောင်း ထုတ်ပြန်ထားပါတယ်။
စစ်ကောင်စီကလည်း ဧပြီ ၂ ရက်ကနေ ဧပြီ ၂၂ ရက်အထိ ၃ ပတ်ကြာ အပစ်ရပ်မယ်လို့ ကြေညာထားပေမဲ့ နိုင်ငံတဝန်းမှာ လေကြောင်းနဲ့ တိုက်ခိုက်တာ ထိုးစစ်ဆင်တာတွေ ပြုလုပ်နေပါတယ်။
မနေ့ တစ်ရက်တည်းမှာတင် TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့အနောက်ပိုင်းရှိ ပင့်ကူတောင်ခြေကို ဂျက်လေယာဥ်နဲ့ ဗုံးကြဲတိုက်ခိုက်ခဲ့ရာ ထိခိုက်မှု မရှိဘူးလို့ သိရပါတယ်။
စစ်တပ်ဟာ နိုင်ငံတဝန်းမှာ လေကြောင်းနဲ့တိုက်ခိုက်တာ ထိုးစစ်ဆင်တာ ပြုလုပ်နေပေမဲ့ စစ်ကောင်စီရဲ့ ပြောခွင့်ရသူ ဗိုလ်ချုပ် ဇော်မင်းထွန်းကတော့ အပစ်ရပ်ပြီးနောက် တိုင်းရင်းသား လက်နက်ကိုင်တွေအပါဝင် ပြည်သူ့ကာကွယ်ရေးတပ်- PDF တွေဟာ စစ်တပ်စခန်းတွေကို တိုက်ခိုက်နေတယ်လို့ စွပ်စွဲပြောဆိုထားပါတယ်။
