မိုင်းရူပ၊ မေလ ၆ ရက်၊ လားရှိုး
၁၀၂၇ စစ်ဆင်ရေး ပထမလှိုင်းအတွင်း ကိုးကန့်ဒေသ လောက်ကိုင် မြို့သိမ်းတိုက်ပွဲမှာ ကိုးကန့်တပ်မတော်- MNDAA ထံ အလံဖြူထောင် လက်နက်ချ အညံ့ခံခဲ့တဲ့ ဗိုလ်မှူးချုပ် အေးမင်းဦးကို စစ်ကောင်စီက အရှေ့မြောက်တိုင်းစစ်ဌာနချုပ် တိုင်းမှူးအဖြစ် ခန့်ခဲ့ကြောင်း ရွှေဖီမြေက စုံစမ်းသိရှိရပါတယ်။
လားရှိုးဆေးရုံမှာ အရေးပေါ်လူနာတွေကို မနေ့ မေလ ၅ ရက်မှာ စတင်ကုသပေးခဲ့ပြီး ဗိုလ်မှူးချုပ် အေးမင်းဦးကိုယ်တိုင် လာရောက် စစ်ဆေးခဲ့တယ်လို့ လားရှိုးမြို့ရှိ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“တိုင်းမှူးလည်း ရောက်နေတယ်။ စစ်သားတွေ အများကြီး ဝင်ကတည်းက သူပါလာပြီးသား။ လောက်ကိုင်ဘက်မှာ ဖမ်းခံရပြီး ပြန်လွှတ်တာ။ ပြီးမှ တိုင်းမှူး တက်လာတာလို့ သိရတယ်”
လောက်ကိုင်တိုက်ပွဲမှာ ဗိုလ်မှူးချုပ် အေးမင်းဦးက အမှတ်(၁၄) စစ်ဆင်ရေး ကွပ်ကဲမှု ဌာနချုပ်မှူးအဖြစ် တာဝန်ယူ ထမ်းဆောင်ခဲ့ပြီး တခြားစစ်ဗိုလ်ချုပ်နဲ့အတူ ကိုးကန့်တပ်ထံ အလံဖြူထောင် လက်နက်ချ အညံ့ခံခဲ့ပြီးနောက် ပြန်လည် လွှတ်မြောက်လာခဲ့တာပဲ ဖြစ်ပါတယ်။
လက်ရှိ လားရှိုးမြို့မှာ စစ်ကောင်စီက ၎င်းတို့ရဲ့ အုပ်ချုပ်ရေးယန္တရားတွေ စတင်အကောင်အထည် ဖော်နေပြီး အုပ်ချုပ်ရေးအဖွဲ့တွေ ထပ်ရောက်လာတယ်လို့ ဒေသခံတွေက ရွှေဖီမြေကို ပြောပါတယ်။
ဒါ့အပြင် စစ်ကောင်စီတပ်ဖွဲ့ဝင်တွေ လားရှိုးမြို့ကို ထပ်ရောက်လာဖို့ ရှိတယ်လို့ သိထားရကြောင်း လားရှိုးမြို့ရှိ နောက်ထပ်အရင်းအမြစ်တစ်ဦးက ရွှေဖီမြေကို ပြောပါတယ်။
တရုတ်ရဲ့ ကြားဝင်စေ့စပ်မှုကြောင့် စစ်ကောင်စီတပ်နဲ့ MNDAA အပစ်ရပ်ဖို့ သဘောတူခဲ့ပြီးနောက် ကိုးကန့်တပ်ဟာ လားရှိုးမြို့ကနေ ပြီးခဲ့တဲ့ ဧပြီ ၂၁ ရက်က ထွက်ခွာခဲ့ရပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက် လည်ပတ်နေပါတယ်။
စစ်ကောင်စီရဲ့ အရှေ့မြောက်တိုင်းစစ်ဌာနချုပ် အခြေစိုက်ရာ လားရှိုးမြို့ကို MNDAA နဲ့ နွေဦးတော်လှန်ရေးတပ်တွေက ပူးပေါင်းပြီး ပြီးခဲ့တဲ့ ၂၀၂၄ ခုနှစ် ဩဂုတ် ၃ ရက်မှာ တိုက်ခိုက်သိမ်းပိုက်ထားရာကနေ ၈ လကျော်အကြာမှာ စစ်ကောင်စီကို ပြန်လည်လွှဲပြောင်းပေးခဲ့ရတာ ဖြစ်ပါတယ်။
