မြတ်နိုး၊ ဇန်နဝါရီ ၂၆ ရက်၊ ဗန်းမော်
ကချင်ပြည်နယ် ဗန်းမော်ရှိ စစ်ကောင်စီတပ်ရဲ့ သံချပ်ကာတပ်ကို မနေ့ ဇန်နဝါရီ ၂၅ ရက်မှာ KIA နဲ့ ပူးပေါင်းတပ်ဖွဲ့က အပြီးသတ် ရှင်းလင်းသိမ်းပိုက်လိုက်ပြီး သံချပ်ကာကား ၇ စီး သိမ်းပိုက်ရရှိခဲ့ကြောင်း ရှေ့တန်းနဲ့ နီးစပ်သူတွေဆီက သိရပါတယ်။
“ဗန်းမော်မြို့ရှိ စစ်ကောင်စီရဲ့ သစခ ၇၂ ကွပ်ကဲမှုအောက်က အမှတ် ၇၀၀၆ သံချပ်ကာတပ်ရင်းကို ယမန်နေ့ ဇန်နဝါရီ ၂၅ ရက်နေ့ ညနေ ၄ နာရီလောက်မှာ အပြီးသတ် ရှင်းလင်းသိမ်းပိုက်လိုက်ပြီ။ သံချပ်ကာ စုစု ပေါင်း ၇ စီး ရထားတယ်” လို့ ရှေ့တန်းနဲ့ နီးစပ်သူတစ်ဦးက ပြောပါတယ်။
ဇန်နဝါရီ ၂၄ ရက်ကလည်း အမှတ် ၇၀၀၆ သံချပ်ကာတပ်ရင်းရှိ သံချပ်ကာ ၄ စီးသိမ်းပိုက်ရရှိခဲ့တဲ့အပြင် ၀န်တင်တပ်ရင်း၊ ထောက်ပို့တပ်ရင်းလည်း သိမ်းပိုက်ရရှိခဲ့တယ်လို့ ဆိုပါတယ်။
“မနေ့က မနက်ပိုင်း စစ်ကောင်စီအရာရှိ တစ်ယောက် ဖမ်းမိထားတယ်လို့ ကြားတယ်။ လေယာဉ်နဲ့ ဒရုန်းဗုံးတွေ တော်တော်ကြဲတယ်” လို့ ဒေသခံ အမျိုးသမီးတစ်ဦးက ပြောပါတယ်။
မနေ့မနက် ၅ နာရီခန့်ကစပြီး နှစ်ဖက်တပ်ဖွဲ့ ပစ်ခတ်မှု ပြန်လည် စတင်ခဲ့ကာ စကစ ၂၁ ၀န်းကျင်မှာေတာ့ တိုက်ပွဲ ပြင်းထန်တယ်လို့ ဆိုပါတယ်။
စစ်တပ်က ဗန်းမော်မြို့ လက်မလွှတ်ရေးအတွက် လေကြောင်း၊ ဒရုန်း အပြင်းအထန် အသုံးပြု တိုက်ခိုက်နေကြောင်း ရှေ့တန်းနဲ့ နီးစပ်သူတွေက ပြောပါတယ်။
လက်ရှိမှာတော့ ကျန်ရှိနေသေးတဲ့ စစ်ကောင်စီ တပ်စခန်းတွေကို ၀န်းရံပိတ်ဆို့ထားဆဲ ဖြစ်တယ်လို့ ဆိုပါတယ်။
စစ်ကောင်စီရဲ့ ဝါဒဖြန့် တယ်လီဂရမ် ချန်နယ်မှာတော့ သံချပ်ကာ ၇ စီး ရန်သူတပ်က သိမ်းထားကြောင်း၊ အမှတ် ၇၀၀၆ သံချပ်ကာတပ်ရင်း သိမ်းခံရကြောင်း ဖော်ပြထားပါတယ်။
ဗန်းမော်က အမှတ် ၉၃၃ ထောက်ပို့တပ်ရင်းဘက်ကနေ တပ်ဆုတ်ပေးလိုက်ရပြီး ဗန်းမော်တက္ကသိုလ်ဘက် ပူးပေါင်းထားကာ လက်ရှိမှာတော့ ပိတ်မိနေတဲ့ အနေအထားဖြစ်ကြောင်း ဖော်ပြထားပါတယ်။
စကခ ၂၁ က အရာရှိစစ်သည်တချို့ မနေ့ညက စတင်ဆုတ်ခွာနေပြီဖြစ်ပြီး ရန်သူက တင့်ကား ၉ စီးနဲ့ ပစ်နေကာ ကြေမွကုန်ပြီးတော့ အကျအဆုံး များတယ်လို့လည်း ဖော်ပြထားပါတယ်။
ဇန်နဝါရီ ၂၄ ရက် နေ့လယ် ၂ နာရီခန့်ကလည်း စစ်တပ်က ဗန်းမော်ဘက် တိုက်ပွဲ ပြင်းထန်တာကြောင့် လိုင်ဇာမြို့အနီးနဲ့ လိုင်ဇာမြို့ပေါ်ရှိ မြစ်ကြီးနား ဟိုတယ်ကို အသေခံ ဒရုန်းနဲ့ ဗုံးကြဲ တိုက်ခိုက်ခဲ့ပါတယ်။
ဗန်းမော်မြို့ကို ပြီးခဲ့တဲ့ ၂၀၂၄ ဒီဇင်ဘာ ၄ ရက်ကစ KIA နဲ့ ပူးပေါင်းတော်လှန်ရေး တပ်ဖွဲ့တွေ စတင် ထိုးစစ်ဆင်ခဲ့တာ ဖြစ်ပါတယ်။
