မိုင်းရူပ၊ ဧပြီ ၅ ရက်၊ နောင်ချို
ရှမ်းမြောက် နောင်ချိုမြို့နယ် တောင်းခမ်းရွာနဲ့ မန္တလေးတိုင်း သပိတ်ကျင်းမြို့နယ် ၇ မိုင်ရွာမှာ စစ်ကောင်စီတပ်နဲ့ တအာင်းတပ်မတော်- TNLA ပူးပေါင်းတပ်တို့အကြား တိုက်ပွဲ ဆက်လက် ပြင်းထန်နေတယ်လို့ ရှေ့တန်း သတင်းအရင်းအမြစ်တွေက ရွှေဖီမြေကို ပြောပါတယ်။
စစ်ကောင်စီရဲ့ အမြှောက်တပ်တွေ တည်ရှိရာ တောင်းခမ်းရွာမှာ ပြီးခဲ့တဲ့ ဧပြီ ၃ ရက်ကလည်း စစ်တပ်ဘက်က စစ်အင်အား ဖြည့်တင်းပြီးနောက် မနေ့ ဧပြီ ၄ ရက်ကစပြီး TNLA တည်ရှိရာကို ထိုးစစ်ဆင် တိုက်ခိုက်လာတာပဲ ဖြစ်ပါတယ်။
“၉၀၂ တပ်စခန်းမှာ တိုက်ပွဲက ပြင်းထန်နေတယ်။ စစ်ကောင်စီဘက်က အင်အား ဖြည့်ပြီးနောက်ပိုင်း ထိုးစစ် ပြန်လုပ်လာတာ” လို့ ရှေ့တန်း စစ်မြေပြင်မှာ ရှိနေသူတစ်ဦးက ပြောပါတယ်။
တောင်းခမ်းရွာမှာ စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ် ၉၀၂ တပ်အပါအဝင် အမြှောက်တပ်တပ်စခန်းတွေ ဖြစ်တဲ့ ၃၅၄၊ ၂၀၆ နဲ့ ၄၀၆ တပ်တွေ အခြေချ တပ်စွဲထားတာဖြစ်ပြီး ပြီးခဲ့တဲ့ ၂၀၂၄ ခုနှစ် ဩဂုတ်လကတည်းက စစ်တပ်နဲ့ TNLA တို့အကြား တိုက်ပွဲ စတင်ဖြစ်ပွားခဲ့တာပါ။
သပိတ်ကျင်းမြို့နယ် ၇ မိုင်ရွာမှာတော့ TNLA၊ မိုးကုတ်ဗျူဟာနဲ့ မန္တလေး PDF တွေ တည်ရှိရာကို စစ်တပ်ဘက်က ထိုးစစ်ဆင်တိုက်ခိုက်နေသလို မနေ့မှာလည်း စစ်ကောင်စီတပ်ဘက်က ဂျက်လေယာဥ်နဲ့ ဗုံးကြဲတိုက်ခိုက်ခဲ့ပါတယ်။
“၇ မိုင်မှာက တိုက်ပွဲတွေ ဆက်ဖြစ်နေတုန်းပဲ။ လေယာဥ်နဲ့လည်း လာကြဲတယ်” လို့ ၇ မိုင်ရှိ ရွှေဖီမြေရဲ့ သတင်းအရင်းအမြစ်တစ်ဦးက ပြောပါတယ်။
ညီနောင်မဟာမိတ် ၃ ဖွဲ့က ငလျင်သင့်တဲ့လူထုတွေကို စာနာတဲ့အနေနဲ့ ပြန်လည် ထူထောင်ရေး လုပ်နိုင်ဖို့ ဧပြီ တစ်လလုံး အပစ်ရပ်ကြောင်း ထုတ်ပြန်ထားပါတယ်။
စစ်တပ်ကလည်း ဧပြီ ၂ ရက်ကနေ ၂၂ ရက်အထိ ၃ ပတ်ကြာ အပစ်ရပ်မယ်လို့ ကြေညာထားပေမဲ့ တော်လှန်ရေး အင်အားစုတွေထိန်းချုပ်ဒေသကို လေကြောင်းနဲ့ တိုက်ခိုက်တာ ထိုးစစ် ဆင်တာတွေ ပြုလုပ်နေပါတယ်။
ဒီနေ့ ဧပြီ ၅ ရက်မှာလည်း TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ အနောက်ပိုင်းရှိ ပင့်ကူတောင်ခြေကို ဂျက်လေယာဥ်နဲ့ ဗုံးကြဲတိုက်ခိုက်ခဲ့ရာ ထိခိုက်မှု မရှိဘူးလို့ သိရပါတယ်။
