မိုင်းရူပ၊ မေလ ၂၅ ရက်၊ နောင်ချို
စစ်ကောင်စီရဲ့ အမြှောက်တပ်တွေတည်ရှိရာ တောင်းခမ်းကျေးရွာအနီးတစ်ဝိုက်မှာ စစ်တပ်နဲ့ တအာင်းတပ်မတော်- TNLA တို့အကြား တိုက်ပွဲ ဆက်လက် ပြင်းထန်နေတယ်လို့ ရှေ့တန်း သတင်းအရင်းအမြစ်တွေက ရွှေဖီမြေကို ပြောပါတယ်။
မနေ့ မေလ ၂၄ ရက်မှာ တောင်းခမ်းအနီးရှိ နောင်လိတ်ရွာမှာ စစ်တပ်နဲ့ TNLA အကြား တိုက်ပွဲ ဖြစ်ပွားခဲ့တယ်လို့ ရှေ့တန်း စစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
“မနေ့ နောင်လိတ်ရွာမှာ တိုက်ပွဲဖြစ်တာရှိတယ်။ ဒီနောက်ပိုင်းမှာ စစ်ကောင်စီက လေယာဉ်ကို အရင်ကလောက် သုံးတာ မတွေ့ရတော့ဘူး။ လက်နက်ကြီး၊ အဆိပ်ငွေ့နဲ့ ဒရုန်းတွေကို ပိုအသုံးပြုလာတယ်”
စစ်တပ်ဟာ ၎င်းတို့ လက်လွှတ်ထားရတဲ့ နောင်ချိုမြို့ကို ပြန်ရဖို့ ပြီးခဲ့တဲ့ ဖေဖော်ဝါရီလကစပြီး တောင်းခမ်းနဲ့ အုမ္မတီးဘက်ကနေ ထိုးစစ်ဆင် တိုက်ခိုက်နေပြီး တအာင်းတပ်ဘက်က ၎င်းတို့ ထိန်းချုပ်ထားတဲ့ နေရာအချို့ လက်လွှတ်ခဲ့ရပါတယ်။
ပြီးခဲ့တဲ့ မေလ ၂၀ ရက်မှာလည်း စစ်တပ်ဘက်က ထိုးစစ်ဆင် တိုက်ခိုက်နေတာကြောင့် TNLA ထိန်းချုပ်ထားတဲ့ သရက်ချိုစေတီကုန်းကို စစ်ကောင်စီတပ်က ပြန်ထိန်းချုပ်ခဲ့ပါတယ်။
တောင်းခမ်းကျေးရွာမှာ စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ် ၉၀၂ အပါအဝင် အမြှောက်တပ်တပ်စခန်းတွေဖြစ်တဲ့ ၃၅၄၊ ၂၀၆ နဲ့ ၄၀၆ တပ်တွေ အခြေချတပ်စွဲထားတာဖြစ်ပြီး ပြီးခဲ့တဲ့ ၂၀၂၄ ခုနှစ် သြဂုတ်လကတည်းက စစ်တပ်နဲ့ TNLA တိုက်ပွဲ ဖြစ်ပွားခဲ့တာပါ။
TNLA ပါဝင်တဲ့ ညီနောင်မဟာမိတ် ၃ ဖွဲ့က မေလကုန်အထိ အပစ်ရပ်ကြောင်း ထုတ်ပြန်ထားသလို စစ်ကောင်စီတပ်ကလည်း မေလကုန်အထိ အပစ်ရပ်မယ်လို့ ကြေညာထားပေမဲ့ ပစ်ခတ်တိုက်တာနဲ့ ထိုးစစ်ဆင်တာတွေ ဆက်ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
