မိုင်းရူပ၊ ဇွန်လ ၄ ရက်၊ လားရှိုး
ရှမ်းမြောက် လားရှိုးမြို့အနီးရှိ ကိုးကန့်တပ်မတော် MNDAA ထိန်းချုပ်ထားတဲ့ ကျေးရွာ ၂၀ မှာ အခြေခံပညာကျောင်းတွေ ဖွင့်လှစ်သွားမယ်လို့ ကိုးကန့်တပ်က မနေ့ ဇွန်လ ၃ ရက်မှာ ထုတ်ပြန်ထားပါတယ်။
အဲဒီကျေးရွာတွေမှာ မနက်ဖြန် ဇွန်လ ၅ ရက်ကစပြီး ကျောင်းအပ်လက်ခံမှာဖြစ်ပြီး မူလတန်းတွေအတွက် ကျောင်းဝင်ကြေးအခမဲ့ ဖြစ်တယ်လို့ ဆိုပါတယ်။
စာသင်ကျောင်း ဖွင့်လှစ်သွားမယ့် ကျေးရွာတွေဟာ မယ်ဟန်၊ ခေးနင်း၊ နောင်မွန်၊ မန်ဆန်ရေကျ၊ ခါးရှိ၊ မန်ပျဥ်၊ သံလွင်၊ နမ့်ပေါင်၊ နမ္မဗောဓ၊ လွယ်ငင်း၊ ဟိုယ၊ ရှန်ခိုက်၊ ခိုက်ရှန်၊ နောင်လိုင်၊ အီနိုင်း၊ ကုန်းညို့၊ နမ့်ဟူး၊ အောင်သစ္စာ၊ ဟိုပိတ်နဲ့ နမ့်ကျန်စတဲ့ ကျေးရွာတွေ ဖြစ်ပါတယ်။
“အဲကျောင်းတွေကို အထူးဒေသ (၁) ပညာရေးဌာနအောက်ကနေ သွားမှာပါ။ စကစပညာရေးအောက်ကနေ သွားမှာ မဟုတ်ပါဘူး” လို့ ကိုးကန့်တပ်နဲ့ နီးစပ်သူတစ်ဦးက ရွှေဖီမြေကို ပြောပါတယ်။
ကျောင်းတက်မယ့် ကျောင်းသူ ကျောင်းသားတွေကို အရင်လက်ခံသွားမှာဖြစ်ပြီး စာသင်ကျောင်းတွေ ဖွင့်လှစ်မယ့်ရက်အတိအကျကိုတော့ မသိရသေးပါဘူး။
အထူးဒေသ (၁) အတွင်းရှိ စာသင်ကျောင်းတွေကိုလည်း ကျောင်းဖွင့်လှစ်နိုင်ဖို့ ထောက်ပံ့ပေးသွားမယ်လို့ ကိုးကန့်တပ်က ဆိုပါတယ်။
ကိုးကန့်တပ်ဟာ တရုတ်ရဲ့ ကြားဝင်စေ့စပ်မှုကြောင့် လားရှိုးမြို့တွင်းရှိ ရပ်ကွက် (၁၂) ခုကို စစ်ကောင်စီထံ ပြန်ပေးခဲ့ရပြီး လားရှိုးမြို့အပြင်က ကျေးရွာတွေကိုသာ ထိန်းချုပ်ထားတာ ဖြစ်ပါတယ်။
MNDAA ထိန်းချုပ်ထားတဲ့ဒေသက စာသင်ကျောင်းတွေမှာ တာဝန်ထမ်းဆောင်ဖို့ CDM ဆရာဆရာမတွေ ဖိတ်ခေါ်ကြောင်း မေလ ၂၅ ရက်မှာ ကိုးကန့်တပ်က ကြေညာချက် ထုတ်ပြန်ထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
