ပို့လဘား၊ ဩဂုတ် ၂၀ ရက်၊ နောင်ပိန်
ကျောက်မဲမြို့နယ် နောင်ပိန်ကျေးရွာကို စစ်တပ်က ဗုံးကြဲတိုက်ခိုက်လို့ ကလေးအပါအဝင် ဒေသခံ ၁၀ ဦးထက်မနည်း သေဆုံးပြီး ၁၂ ဦး ဒဏ်ရာ ရရှိခဲ့တယ်လို့ ရှမ်းတပ်မတော်- SSPP/SSA က ထုတ်ပြန်ထားပါတယ်။
ဒီနေ့ ဩဂုတ် ၂၀ ရက် မနက် ၁၀ နာရီခွဲမှာ နောင်ပိန် အလယ်ကျောင်းမှာ စစ်တပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
ဒေသခံတစ်ဦးက “ပေါင် ၅၀၀ လာချတယ်။ ကလေးတစ်ယောက်က ဗိုက်ပွင့်ပြီး ခေါင်း စုတ်ပြတ်သတ်သွားတယ်။ နောင်ပိန် အလယ်ကျောင်းနားမှာတစ်လုံး၊ လုပ်ပါ ရဲစခန်းရှေ့ ပွဲရုံမှာလည်း တစ်လုံးကျတယ်။ သေဆုံးသူ တိုးလာနိုင်တယ်” လို့ ပြောပါတယ်။
စစ်တပ်ဟာ ဒရုန်းနဲ့လက်နက်ကြီး ဆက်တိုက် ပစ်ခတ်တိုက်ခိုက်တာကြောင့် နောင်ပိန်ရွာခံအပြင် ဇီးပင်၊ ပင်ပေါ၊ ပင်တိန်၊ ပင်တီး၊ ကျောင်းကုန်း၊ ဖီသစ်၊ ခေးနင်းနဲ့ လွယ်ကုန်ဒေသခံတွေလည်း ထွက်ပြေးတိမ်းရှောင်နေရတယ်လို့ ဆိုပါတယ်။
ဒါ့အပြင် စစ်တပ်ဘက်က ထိုးစစ်ဆင် တိုက်ခိုက်နေတာကြောင့် နောင်ပိန်ရွာအနီး ထန်းတပင်ရွာဘက်မှာ စစ်တပ်နဲ့ တအာင်းတပ်- TNLA တို့ တိုက်ပွဲ ပြင်းထန်နေတယ်လို့ ဆိုပါတယ်။
ပြီးခဲ့တဲ့ ဩဂုတ် ၁၈ ရက် နေ့လယ်ပိုင်းကစပြီး နောင်ချိုမြို့ကနေ ကျောက်မဲမြို့နယ် နောင်ပိန်အနီးရှိ လုံကြိမ်နဲ့ ကျောင်းကုန်းရွာဘက် စစ်တပ်က လက်နက်ကြီး ပစ်ခတ်တိုက်ခိုက်ခဲ့တာကြောင့် အရပ်သားတစ်ဦး သေဆုံးပြီး ကိုရင်တစ်ပါး ထိခိုက်ဒဏ်ရာ ရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
