ခိုင်လေး၊ ဇန်နဝါရီ ၃၀ ရက်၊ ရွာငံ
ရှမ်းတောင် ရွာငံမြို့နယ် မင်းပလောင်ရွာကို စစ်တပ်က မီးရှို့ဖျက်ဆီးလိုက်တာကြောင့် ဒေသခံ ၇၀၀ ဝန်းကျင် ဆေးဝါးနဲ့ စားနပ်ရိက္ခာ လိုအပ်နေတယ်လို့ ဓနုပြည်နယ် အမျိုးသားကာကွယ်ရေးတပ်ရဲ့ ပြန်ကြားရေးတာဝန်ခံ ကိုကျားပျံက ရွှေဖီမြေကို ပြောပါတယ်။
ပြီးခဲ့တဲ့ ၂၀၂၄ ခုနှစ် ဒီဇင်ဘာ ၂၂ ရက်နဲ့ ၂၃ ရက်မှာ စစ်တပ်က နှစ်ရက်ဆက်တိုက်မီးရှို့ဖျက်ဆီးခဲ့ရာ မင်းပလောင်ရွာခံတွေဟာ ရွာပြင်မှာ ခက်ခက်ခဲခဲ နေထိုင်နေကြရတယ်လို့ ဆိုပါတယ်။
“တစ်ရွာလုံး ရွာအပြင်မှာပဲ နေထိုင်နေရဆဲပါဗျ။ ဆေးဝါးတွေ လိုအပ်ပါတယ်။ နေအိမ်တွေ ပြန်လည် မထူထောင်နိုင်သေးပါဘူးဗျ။ တောထဲမှာဘဲ တဲဆောက်ပြီး နေ နေကြတာ။ တတ်နိုင်တဲ့ဘက်ကနေ ဝိုင်းဝန်းကူညီပေးကြဖို့ ပြောချင်ပါတယ်”
မင်းပလောင်ရွာခံတွေ စားသောက်ရေး၊ နေထိုင်ရေး ခက်ခဲနေပြီး ဓနုအမျိုးသားကာကွယ်ရေးတပ်- DSNDF/DSNDA က လည်း မင်းပလောင်ရွာခံတွေကို မုန့်ဟင်းခါးကျွေးမွေးကာ မိုးကာ အထည် ၄၀၊ ဆန် ၁၀ တင်းနဲ့ နွေစပါး စိုက်ပျိုးဖို့ မျိုးစပါး တင်း ၅၀ ကျော်ကို ခက်ခက်ခဲခဲ သယ်ယူကာ ကူညီပေးခဲ့တယ်လို့လည်း ထုတ်ပြန်ထားပါတယ်။
ဒေသခံတွေရဲ့ လိုအပ်ချက် ထပ်မံ ရှိနေသေးတာကြောင့် တခြားဒေသက လူထုအနေနဲ့ DSNDA Page ကနေ ဆက်သွယ်ပြီး ဝိုင်းဝန်းကူညီပေးကြဖို့ မေတ္တာရပ်ခံလိုတယ်လို့ ပြောဆိုထားပါတယ်။
