လက်ဖက်မြေ၊ ဖေဖော်ဝါရီ ၁၈ ရက်၊ သီပေါ
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် သီပေါမြို့မှာ တော်လှန်ရေးတပ်တွေနဲ့ ဆပ်စပ်မှုရှိတယ်ဆိုတဲ့ စွပ်စွဲချက်နဲ့ လက်ရှိအချိန်ထိ ဖမ်းဆီးခံရသူတွေ ဆက်ရှိနေတယ်လို့ သီပေါမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၁၅ ရက်မှာတင် အသက် ၃၄ နှစ်အရွယ်ရှိတဲ့ လွေးခိုင်ဖြိုးဆိုသူကို စစ်ကောင်စီတပ်က TNLA နဲ့ ဆက်စပ်မှုရှိတယ်ဆိုတဲ့ စွပ်စွဲချက်နဲ့ ဖမ်းဆီးခဲ့တာဖြစ်ပါတယ်။
“သူက ပလောင်လူမျိုးပဲ။ အဓိက ဖမ်းရတဲ့အကြောင်းအရင်းကလည်း TNLA နဲ့ ဆက်စပ်မှုရှိတယ်ဆိုတဲ့ အချက်ပေါ့။ ဖမ်းဆီးခံရတာက ဒီလထဲ ရက်ပိုင်းလောက်ပဲ ရှိသေးတာ။ အရင်က သိထားသလောက် အဖမ်းခံရတဲ့သူတွေထဲက ပြန်လွှတ်လာတဲ့ သူတွေက နည်းပါတယ်”
သီပေါမြို့ကို TNLA ထိန်းချုပ်စဉ်ကာလတုန်းက အုပ်ချုပ်ရေးမှူး တာဝန်ယူခဲ့တဲ့ အမျိုးသား ၄ ဦးကို စစ်ကောင်စီတပ်က ထောင်ဒဏ် ၇ နှစ်နဲ့ တစ်သက်တစ်ကျွန်း ချမှတ်ခဲ့တဲ့ ဖြစ်စဉ်လည်း ရှိခဲ့ပါတယ်။
အလားတူ စစ်တပ်ပြန်ထိန်းချုပ်ထားတဲ့ ကျောက်မဲနဲ့ နောင်ချိုမြို့မှာလည်း စစ်ကောင်စီတပ်က နေအိမ်တွေကို ချိတ်ပိတ်ပြီး အခုလို မြို့ခံတချို့ ဖမ်းဆီးတာတွေ ရှိတယ်လို့ ဒေသခံတွေက ရွှေဖီမြေကို ပြောဆိုထားပါတယ်။
သီပေါမြို့ကိုတော့ စစ်ကောင်စီတပ်က ပြီးခဲ့တဲ့ ၂၀၂၅ ခုနှစ် အောက်တိုဘာ ၁၇ ရက်မှာ ပြန်လည်ထိန်းချုပ်ခဲ့တာပဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
