မိုင်းဖိူမ်းဆငဲ၊ နိုဝင်ဘာ ၂၇ ရက်၊ ကျောက်မဲ
ရှမ်းမြောက် ကျောက်မဲမြို့ ရက်ကွက် (၇) မှာ နေထိုင်တဲ့ ကိုရဲအောင်ရဲ့ နေအိမ်ကို စစ်ကောင်စီတပ်က ချိတ်ပိတ်ခဲ့ပြီး သူ့ကိုလည်း ဖမ်းဆီးသွားခဲ့တယ်လို့ နီးစပ်သူတစ်ဦးက ရွှေဖီမြေကို ပြောပါတယ်။
ကိုကျော်ရဲအောင်ကို ပြီးခဲ့တဲ့ နိုဝင်ဘာလ ၁၈ ရက်ကတည်းက ဖမ်းဆီးသွားခဲ့တာဖြစ်ပြီး မနေ့ နိုဝင်ဘာလ ၂၆ ရက်အထိ ပြန်လည်လွတ်မြောက်လာခြင်း မရှိသေးဘူးလို့ ဆိုပါတယ်။
“အရင်က ရာအိမ်မှူးဖြစ်ခဲ့ဖူးသူပါ။ တအာင်းစစ်တပ် အုပ်ချုပ်တုန်းကလည်း ဒလန်ထင်ပြီး ဖမ်းဆီးခံခဲ့ဖူးသူပါ။ လေဖြတ်ထားလို့ ပျောက်တာ မကြာသေးပါဘူး။ အခုလည်း စစ်တပ်ပြန်ဖမ်းဆီးခြင်း ခံရသူပါ”
တအာင်း၊ ဗမာ ကပြားဖြစ်တဲ့ ကိုရဲအောင်ဟာ အသက် ၄၀ ကျော်အရွယ်ရှိသူတစ်ဦးဖြစ်ပြီး စစ်ကောင်စီတပ်က ကျောက်မဲမြို့ကို ပြန်လည်ထိန်းချုပ်ပြီးနောက်ပိုင်း ဒေသခံတွေကို တအာင်းတပ် TNLA အပြင် တော်လှန်ရေးတပ်ဖွဲ့တွေနဲ့ ဆက်စပ်မှုရှိတယ်ဆိုတဲ့ စွပ်စွဲချက်နဲ့ ဒေသခံတွေကို ဆက်တိုက်ဆိုသလို ဖမ်းဆီးလာတာ ဖြစ်ပါတယ်။
ပြီးခဲ့တဲ့ နိုဝင်ဘာ ၁၁ ရက်ကလည်း ကျောက်မဲမြို့ပြင်က ဆိုင်ကယ်ပစ္စည်းဆိုင်မှ ဂေါ်ရခါးလူမျိုး ကိုရာဂျန်းဆိုသူကို အလားတူ စွပ်စွဲချက်နဲ့ ဖမ်းဆီးသွားခဲ့သလို နိုဝင်ဘာ ၁၃ ရက် မနက် ၁၁ နာရီဝန်းကျင်မှာ ကျောက်မဲမြို့ နယ်မြေ (၃) ထဲမှာ နေထိုင်တဲ့ အသက် ၅၀ ဝန်းကျင်ရှိတဲ့ အမျိုးသမီးတစ်ဦးကို စစ်ကောင်စီတပ်က ဖမ်းဆီးသွားခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
