ပို့လဘား၊ မတ်လ ၁၆ ရက်၊ နောင်ချို
တအာင်းတပ်(PSLF/TNLA)ထိန်းချုပ်ထားတဲ့ နောင်ချိုမြို့မှာ လေကြောင်းကနေ ဗုံးကြဲတိုက်ခိုက်လို့ ကိုရင် ၈ ပါး နဲ့ ဦးဇင်း ၁ပါး အပါအဝင် စုစုပေါင်း ဒေသခံ ၁၄ ဦး သေဆုံးခဲ့ပြီး အများအပြား ထိခိုက်ဒဏ်ရာ ရခဲ့ကြတယ်လို့ ရွှေဖီမြေက စုံစမ်းသိရှိရပါတယ်။
ဒီနေ့ မတ်လ ၁၆ ရက် ညနေ ၅ နာရီခွဲအချိန်မှာ နောင်ချိုမြို့မှာရှိတဲ့ စိန်ရတနာ ပရိယတ္တိစာသင်တိုက်ကို စစ်ကောင်စီတပ်က လေယာဉ်နဲ့ ဗုံးကြဲတိုက်ခိုက်ခဲ့တဲ့အပြင် စက်သေနတ်တွေလည်း လာရောက်ပစ်ခတ်တိုက်ခိုက်ခဲ့တယ်လို့ ပြောပါတယ်။
” ၅ နာရီကတည်းက လေယာဉ်လာဝဲတယ်။ ၄ လုံးလာပစ်ချတယ်။ သေတဲ့သူလည်းများတယ်။ ကျောင်းထဲလာချတာဆိုတော့ ကိုရင်တွေအများကြီး ထိတယ်”
အဆိုပါ ဗုံးကျရောက်ပေါက်ကွဲမှုကြောင့် လူထိခိုက်မှုအများအပြား ရှိသလို နေအိမ်နဲ့ ကျောင်းဆောင်လည်း ထိခိုက်ပျက်စီးတာ အများအပြား ရှိတယ်လို့ ဆိုပါတယ်။
သေဆုံးသူနဲ့ ထိခိုက်ဒဏ်ရာရသူ အချက်အလက်တွေဟာ ဆက်လက်တိုးလာနိုင်ပြီး ရွှေဖီမြေအနေနဲ့ ဆက်လက်စုံစမ်းနေဆဲ ဖြစ်ပါတယ်။
