ပျားကြီး၊ မတ်လ ၁၂ ရက်၊ ပေါက်
မကွေးတိုင်း ပေါက်မြို့နယ် ထောက်ရှာပင်ကျေးရွာကို စစ်ကောင်စီတပ်က စက်တပ်လေထီး (Paramoter)နဲ့ လေကြောင်းတိုက်ခိုက်မှု ပြုလုပ်ခဲ့တာကြောင့် အမျိုးသမီးတစ်ဦး သေဆုံးပြီး ကျောင်းသူတစ်ဦး ဒဏ်ရာ ရရှိခဲ့တယ်လို့ ဒေသခံတွေက ပြောပါတယ်။
မနေ့ မတ်လ ၁၁ ရက် နေ့လယ် ၃ နာရီခွဲဝန်းကျင်က ပုသိမ်-မုံရွာ ကားလမ်းမပေါ်မှာရှိတဲ့ ထောက်ရှာပင်ရွာကို စက်တပ်လေထီး ၂ စီးနဲ့ ဗုံး ၃ လုံးထက်မနည်း ကြဲချခဲ့ပြီး စက်သေနတ်နဲ့ ပစ်ခတ်တိုက်ခိုက်မှု ပြုလုပ်ခဲ့တာ ဖြစ်ပါတယ်။
“ကျောင်းဘေးနားက အရင် စစ်ကြောင်း ထိုးတုန်းက မီးရှို့ခံလိုက်ရတဲ့ အိမ်ပေါ် ကျတာ။ အဲဒီအိမ်ဘေးက အမျိုးသမီးတစ်ဦး ဆုံးသွားတယ်။ ကျောင်းဆင်းချိန်ဆိုတော့ ကလေးတွေလည်း နီးရာစပ်ရာ ပြေးကြရတာပေါ့။ ကျောင်းသူတစ်ဦးတော့ ထိတယ်။ အရမ်းကြီးတော့ မစိုးရိမ်ရပါဘူး” လို့ ဒေသခံတစ်ဦးက ပြောပါတယ်။
ထောက်ရှာပင်ရွာဟာ ပြီးခဲ့တဲ့ ၂၀၂၂ ခုနှစ်အတွင်းက စစ်တပ်ရဲ့ စစ်ကြောင်းထိုး မီးရှို့ဖျက်ဆီးခံခဲ့ရတဲ့ ကျေးရွာတစ်ရွာဖြစ်ပြီး လက်ရှိအချိန်ထိ မီးရှို့ခံထားရတဲ့ နေအိမ်အများစုက အသစ် ပြန်မဆောက်နိုင်သေးဘူးလို့ ဒေသခံတွေက ပြောဆိုပါတယ်။
လက်ရှိအချိန်မှာ ထောက်ရှာပင်ရွာအပါအဝင် အနီးအနား ကျေးရွာက ဒေသခံတွေဟာ လေကြောင်း တိုက်ခိုက်မှုကြောင့် စိုးရိမ်ထိတ်လန့်မှု ရှိနေပြီး ကျယ်လောင်တဲ့စက်သံ ကြားတဲ့အခါမှာ ထွက်ပြေးပုန်းအောင်းမှု ရှိလာတဲ့အထိ ထိတ်လန့်နေကြတယ်လို့ ဒေသခံတွေက ပြောပါတယ်။
