ရွှေဖီမြေ၊ ဖေဖော်ဝါရီ ၁၉ ရက်၊ နောင်ချို
တရုတ်နိုင်ငံက ဆွေးနွေးပွဲ ပျက်ပြယ်သွားပြီးနောက် တအာင်းတပ် ထိန်းချုပ်ထားတဲ့ နောင်ချိုမြို့ကို စစ်ကောင်စီတပ်က လေကြောင်းကနေ ဗုံး ထပ်မံ ကြဲချခဲ့ပါတယ်။
ဒီနေ့ ဖေဖော်ဝါရီ ၁၉ ရက် ၈ နာရီ ၁၅ မိနစ်ခန့်မှာ ကြဲချခဲ့တာဖြစ်ပြီး ပြည်သူ့ဆေးရုံနဲ့ ရဲစခန်းကို အဓိက တိုက်ခိုက်ခဲ့တာ ဖြစ်ပါတယ်။
“ဆေးရုံက တစ်လုံး ထိတယ်။ နောက်တစ်လုံးကတော့ ရဲစခန်းကို ကြဲတာ။ ဆေးရုံမှာတော့ အထိအခိုက်တွေ ရှိနိုင်တယ်။ စာရင်းအတိအကျ မသိရသေးဘူ” လို့ နောင်ချိုရှိ သတင်းအရင်းအမြစ်က ပြောပါတယ်။
စစ်ကောင်စီနဲ့ ၂ ရက်တာ ဆွေးနွေးပွဲမှာ ဆက်လက် ဆွေးနွေးဖို့ အခက်အခဲ ဖြစ်လာတာကြောင့် ရပ်တန့်သွားခဲ့ပြီး နောက်တစ်ကြိမ် ပြန်လည် တွေ့ဆုံဖို့သာ သဘောတူညီခဲ့တယ်လို့ TNLA ဘက်က ထုတ်ပြန်ထားပါတယ်။
ဆွေးနွေးပွဲ လုပ်နေစဉ် ဖေဖော်ဝါရီ ၁၇ ရက်မှာလည်း နောင်ချိုနဲ့ နမ္မတူမြို့ကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့ပါတယ်။
