မိုင်းရူပ၊ ဖေဖော်ဝါရီ ၁၈ ရက်၊ လားရှိုး
ကိုးကန့်တပ်မတော်- MNDAA ထိန်းချုပ်ထားတဲ့ လားရှိုးမြို့မှာ တရုတ်နှစ်သစ်ကူးပွဲပြီးရင် လောင်းကစားဝိုင်းတွေကို ပြန်လည်တင်းကြပ်မယ်လို့ MNDAA ရဲ့ အုပ်ချုပ်ရေးအဖွဲ့နဲ့ နီးစပ်တဲ့သူတွေဆီက သိရပါတယ်။
လားရှိုးမှာ တရုတ်နှစ်သစ်ကူးပွဲကို ပြီးခဲ့တဲ့ ဇန်နဝါရီ နောက်ဆုံးအပတ်ကနေ စတင်ကျင်းပခဲ့ရာ ဇန်နဝါရီ ၂၀ ရက်အထိ ၁ လကြာ ကျင်းပမှာဖြစ်ပြီး လောင်းကစားဝိုင်းတွေလည်း ဖွင့်လှစ်ခွင့် ပေးထားတာ ဖြစ်ပါတယ်။
“ပိတ်မယ်လို့တော့ မဟုတ်ဘူး။ ပြန်လည် စီစစ်မယ်။ စည်းကမ်း ပြန်လည် တင်းကြပ်မယ်ပေါ့။ လက်ရှိတော့ မဟုတ်ပေမဲ့ နိုင်ငံတကာ ဥပဒေနဲ့အညီ လုပ်သွားဖို့ ရှိတယ်” လို့ MNDAA ရဲ့ အုပ်ချုပ်ရေးအဖွဲ့နဲ့ နီးစပ်သူတစ်ဦးက ရွှေဖီမြေကို ပြောပါတယ်။
လားရှိုးမှာ လောင်းကစားဝိုင်း ပေါ်တင် ဖွင့်လှစ်နေပြီး လမ်းဘေးမှာ ၂ လုံး၊ ၃ လုံး ချဲတွေကိုလည်း ပေါ်တင် ရောင်းချတာတွေရှိနေပြီး ခိုးဆိုးလုယက်မှု ပြန်ဖြစ်မှာကို ဒေသခံတွေက စိုးရိမ်နေကြပါတယ်။
“ပွဲက ၂၀ ရက်နေ့အထိလေ။ ဒါတောင် ပွဲက ဆက်စည်နေရင် ရက် ထပ်တိုးမယ်လို့ ပွဲမတိုင်ခင်ကတည်းက ပြောတာရှိတယ်။ လူတိုင်း စိုးရိမ်နေပါတယ်။ အခုတလော ခိုးမှုတွေတော့ ရှိပေမဲ့ အရင်တုန်းကလို အဆိုးဝါးကြီးတော့ မဟုတ်ဘူး” လို့ လားရှိုးဒေသခံတစ်ဦးက ရွှေဖီမြေကို ပြောပါတယ်။
လားရှိုးမြို့ကို ပြီးခဲ့တဲ့ ၂၀၂၄ ဩဂုတ် ၃ ရက်မှာ MNDAA နဲ့ပူးပေါင်းတပ်တွေက တိုက်ခိုက်သိမ်းပိုက်ပြီး MNDAA က စီမံအုပ်ချုပ်နေတာ ဖြစ်ပါတယ်။
