လွေးဇွန်မိုး၊ ဖေဖော်ဝါရီ ၂၆ ရက်၊ လောက်ကိုင်
တရုတ်ရဲ့ ကြားဝင်စေ့စပ်မှုကြောင့် စစ်ကောင်စီတပ်နဲ့ ကိုးကန့်တပ်(MNDAA)တို့ အပစ်ရပ်ပြီးနောက်ပိုင်း MNDAA ထိန်းချုပ်ထားတဲ့ လောက်ကိုင်မြို့နယ်ကဒေသခံအများစုဟာ နေရပ်ပြန်လာကြပြီလို့ စုံစမ်းသိရပါတယ်။
MNDAA နဲ့ စစ်ကောင်စီတပ်တို့ တရုတ်နိုင်ငံ ကူမင်းမြို့မှာ တွေ့ဆုံဆွေးနွေးပြီးနောက် ပြီးခဲ့တဲ့ ဇန်နဝါရီ ၁၈ ရက်ကစပြီး အပစ်အခတ်ရပ်စဲဖို့ သဘောတူခဲ့တာဖြစ်ပါတယ်။
စစ်ကောင်စီတပ်ရဲ့လေကြောင်းရန်ကြောင့် ဝပြည်ဘက်ကို စစ်ရှောင်သွားတဲ့ လောက်ကိုင်က ဒေသခံတွေလည်း အပစ်ရပ်ပြီးနောက် မြို့ထဲပြန်ဝင်လာတယ်လို့ ကွတ်ခိုင် – လောက်ကိုင် ကားပြေးဆွဲနေတဲ့ ကားသမားတစ်ဦးက ပြောပါတယ်။
“အပစ်မရပ်ခင်ကဆို လောက်ကိုင်မြို့ထဲ လူမရှိဘူး။ အပစ်ရပ်ပြီးတဲ့နောက်မှ လူတွေပြန်စည်လာတယ်။ အရင်တုန်းကဆို လေယာဥ်ခဏခဏလာကြဲတော့ ဝပြည် နမ့်တစ်ဘက် သွားနေကြတာလေ။ အခုတော့ ကိုယ့်အိမ်မှာ ကိုယ်ပြန်နေရဲကြပြီ”လို့ ဆိုပါတယ်။
လက်ရှိလောက်ကိုင်မြို့ထဲမှာ MNDAA တပ်ရဲ့ အုပ်ချုပ်ရေးယန္တယားတွေ လည်ပတ်နေပြီး မြို့ထဲက စျေးဆိုင်ခန်းတချို့လည်း ပြန်ဖွင့်နေပြီလို့ အထက်ပါ အမျိုးသားက ဆက်ပြောပါတယ်။
“ဆိုင်တွေဘာတွေတော့ ပြန်ဖွင့်နေကြပြီ။ ကုမ္ပဏီတွေတော့ ပြန်မဖွင့်သေးဘူး။ လမ်းတွေဘာတွေလည်း အကုန်ပြန်ပြင်ပြီးပြီ။ တိုက်ပွဲအတွင်းလက်နက်ကြီးထိထားတဲ့ ကုမ္ပဏီတွေ ဘာတွေကြတော့ ဘာမှမလုပ်ဘူး။ ဗမာကျောင်းတွေ ဘာတွေတော့ ဖွင့်တာမတွေ့သေးဘူး။ တရုတ်ကျောင်းတော့ဖွင့်ထားကြတယ်”
၁၀၂၇ စစ်ဆင်ရေးအတွင်းမှာ ကိုးကန့်တပ်က ရှမ်းမြောက် လားရှိုး၊ သိန္နီ၊ လောက်ကိုင်၊ ချင်းရွှေဟော်၊ ကုန်းကြမ်း၊ ကွမ်းလုံ၊ ဖောင်းဆိုင်၊ မုံးကိုး၊ ကြူကုတ်(ပန်ဆိုင်း) စတဲ့မြို့တွေကို တိုက်ခိုက်သိမ်းပိုက်ခဲ့တာဖြစ်ပါတယ်။
လက်ရှိမှာ စစ်ကောင်စီတပ်နဲ့ အပစ်ရပ်သဘောတူထားပေမယ့် သဘောတူထားခဲ့တဲ့ အချက်အလတ်အသေးစိတ်ကိုတော့ တစ်ဖက်ကမှ ထုတ်ပြန်လာတာမျိုး မရှိသေးပါဘူး။
