မိုင်းပန်ပျော်၊ ဇန်နဝါရီ ၂၃ ရက်၊ လားရှိုး
စစ်ကောင်စီတပ်နဲ့ MNDAA အပစ်ရပ်ပြီးနောက် ကိုးကန့်တပ်မတော်- MNDAA ထိန်းချုပ်ထားတဲ့ ရှမ်းမြောက် လားရှိုးမြို့ကနေ စစ်ရှောင်သွားတဲ့ ဒေသခံတချို့ နေရပ်သို့ ပြန်လာကြပါတယ်။
ပြီးခဲ့တဲ့ ဇန်နဝါရီ ၁၇ ရက် ဆွေးနွေးပွဲအပြီး အပစ်ရပ်ကြောင်း ပြောဆိုချက် ထွက်ပေါ်လာပြီးနောက် လားရှိုးမြို့ခံ ထက်ဝက်ကျော် နေရပ်သို့ ပြန်လာကြပြီလို့ လားရှိုးဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“သုံးပုံ နှစ်ပုံလောက်တော့ ပြန်လာကြပြီ။ အစကတည်းက ရှိနေတာပါ။ ဒီနောက်ပိုင်းလည်း ပြန်ဝင်လာကြပါတယ်”
နောက်ထပ် အမျိုးသားတစ်ဦးကလည်း လားရှိုးဒေသခံတချို့က လေကြောင်းရန် ကြောက်ကြတာနဲ့ MNDAA တပ်ထဲ စစ်သားအဖြစ် စုဆောင်းခံရမှာကို စိုးရိမ်လို့ နေရပ်သို့ ပြန်မလာသေးသူ ရှိနေသေးတယ်လို့ ရွှေဖီမြေကို ပြောပါတယ်။
“တချို့လည်း ကြောက်ကြတာပေါ့ အဲဒီလေကြောင်းရန်ကို။ အခုတလော လာမကြဲပေမဲ့ ကြောက်နေတဲ့လူတွေလည်း ရှိသေးတယ်။ တချို့လည်း သူများတွေက ခဏခဏ စာရင်း လာကောက်တယ် ဘာစာရင်း ကောက်တာလဲ မသိဘူး။ တခါတလေလည်း သန်းခေါင်စာရင်းတွေ ပြောလိုက်။ အဲလိုကောက်တော့ စစ်သား လုပ်ရမှာ ကြောက်ကြတာ တချို့လည်း မလာကြသေးဘူး အမျိုးမျိုး ကြားရတယ်”
လားရှိုးမြို့သိမ်းတိုက်ပွဲအတွင်း ဒေသခံအများစုဟာ တောင်ကြီး၊ ပြင်ဦးလွင်၊ မန္တလေးနဲ့ နီးစပ်ရာသို့ ထွက်ပြေးတိမ်းရှောင်ခဲ့ကြတာပဲ ဖြစ်ပါတယ်။
