ယာရူစိင်၊ ဧပြီ ၂၂ ရက်၊ လားရှိုး
ရှမ်းမြောက် လားရှိုးမြို့အထွက်ဂိတ်မှာ နောင်မွန်ဈေးကနေ ပြန်လာတဲ့ အမျိုးသမီးတစ်ဦးကို ဂိတ်စောင့်တဲ့ ကိုးကန့်တပ်သားတစ်ဦးက ညိုမဲတဲ့အထိ ရိုက်နှက်ခဲ့တယ်လို့ ကာယကံရှင်က ရွှေဖီမြေကို ပြောပါတယ်။
ဧပြီ ၂၀ ရက် မနက် ၅ နာရီခွဲဝန်းကျင်မှာ နောင်မွန်ဈေးကနေ ပြန်လာတဲ့ အမျိုးသမီးတစ်ဦးက နောင်မွန်နဲ့ နမ့်ပေါင်ကြားမှာရှိတဲ့ ကိုးကန့်ဂိတ်မှာ ရိုက်နှက်ခံခဲ့ရတာလို့ ဆိုပါတယ်။
“ကျမတို့က တစ်ပတ်တစ်ခါ ဈေးပတ်သွားရတယ်လေ။ နောင်မွန်နဲ့ နမ့်ပေါင် မရောက်ခင် ကိုးကန့်ဂိတ် ရှိတယ်ပေါ့။ အဲဒီဂိတ်မှာ ဂိတ်ကြေး ဆောင်ရတာပေါ့။ တစ်ခါသွားရင် ဂိတ်ကြေး ၁ ထောင် ပေးရတယ်။ မနေ့ကျ ၅ ထောင်ဆိုတော့ သူ့ကို ပြောကြည့်သေးတယ်။ မရဘူးတဲ့ ၅ ထောင် ပေးရမယ်တဲ့။ အနောက်မှာလည်း ကားတွေ တန်စီးနေတော့ ဘေးမှာ ရပ်လိုက်မယ်နော်လို့ သူ့ကို ပြောသေးတယ်။ ဘေးမှာရပ်ဖို့ စက်နှိုးလိုက်တာပါ။ ကားတောင် မရွှေ့သေးဘူး ကားမှန်ချထားတော့ သူကျမရဲ့လည်ပင်းကို ညှစ်လိုက်တာ”
၎င်းအမျိုးသမီးရဲ့ လည်ပင်း ညှစ်တာအပြင် သေနတ်နဲ့ ထုတာ၊ ရိုက်နှက်တာတွေပါ လုပ်ခဲ့တယ်လို့ ၎င်းက ဆက်ပြောပါတယ်။
“ကျမ အရိုက်ခံရတဲ့အချိန်မှာ ဘေးတွေမှာ ယောကျာ်းတွေ အများကြီး ရှိပါတယ်။ သူတို့ကို ကြောက်နေတော့ ဘယ်သူမှ လာမတားရဲဘူး ဖြစ်နေတယ်။ ဂိတ်စောင့်က ဗမာစကားလည်း မတတ်ဘူး။ တရုတ်လူမျိုးကို လာစောင့်ခိုင်းတာ။ အဲလိုကျတော့ အဆင်မပြေဘူးလေ။ အထက်လူကြီးကိုတော့ ပြောထားတယ်။ သူလည်း ပြောပေးပါတယ်။ ကျမ ဖြစ်ချင်တာ ကျမရှေ့မှာ တောင်းပန်စေချင်တာပေါ့”
ပြီးခဲ့တဲ့ ၂၀၂၄ ခုနှစ် ဇန်နဝါရီလတုန်းကလည်း သိန္နီမြို့နယ် မိုင်းလီရွာသူကြီးကို ဖမ်းခေါ်သွားပြီး ရိုက်နှက်ခဲ့တာကြောင့် သေဆုံးခဲ့တဲ့ဖြစ်စဉ်ရှိသလို ဖေဖော်ဝါရီလထဲမှာလည်း မူဆယ် ၁၀၅ မိုင်က ဒေသခံတစ်ဦးကို ကိုးကန့်တပ်က သေလုနီးပါး ရိုက်နှက်ခဲ့တဲ့ဖြစ်စဉ်လည်း ရှိခဲ့ဖူးပါတယ်။
