ယာရူစိင်၊ ဇွန်လ ၂ ရက်၊ ကျောက်မဲ
ရှမ်းမြောက် ကျောက်မဲမြို့ကနေ ရှမ်းတောင် ညောင်ရွှေမြို့ဘက် စစ်ဘေးရှောင်သွားတဲ့ အမျိုးသမီးတစ်ဦး ပျောက်ဆုံးနေတယ်လို့ ၎င်းနဲ့ နီးစပ်သူတစ်ဦးက ရွှေဖီမြေကို ပြောပါတယ်။
ပျောက်ဆုံးသွားတဲ့ အမျိုးသမီးနဲ့ ပြီးခဲ့တဲ့ ၂၀၂၄ ခုနှစ် နိုဝင်ဘာကတည်းက အဆက်အသွယ် ပြတ်တောက်သွားတာဖြစ်ပြီး ဒီနေ့ ဇွန်လ ၂ ရက်အထိ အဆက်အသွယ် ပြတ်တောက်နေဆဲ ဖြစ်ပါတယ်။
“သူ ညောင်ရွှေဘက် ဆွေမျိုးတွေနဲ့အတူ စစ်ဘေးရှောင်တာ။ ဒီဇင်ဘာ ၂၅ ရက်တုန်းက အဆက်အသွယ် ရသေးတယ်။ နောက်ရက်တွေကျ ဖုန်းခေါ်ပေမဲ့ ခေါ်မရတော့ ဖုန်းလိုင်း မရဘူးထင်လို့ ဒီအတိုင်း ထားလိုက်တာ။ လ နည်းနည်းကြာလာတော့ သူတို့အိမ်ကို မေးကြည့်တော့လဲ အိမ်ကို သူရောက်မလာဘူး။ ညောင်ရွှေဘက်ကလူတွေလည်း သူနဲ့အဆက်အသွယ် မရဘူး မသိဘူးဘဲ ပြောနေတာ။ သူ့မိဘတွေကော ကျမတို့လည်း အရမ်းစိတ်ပူနေတယ်” လို့ ၎င်းနဲ့ နီးစပ်သူတစ်ဦးက ပြောပါတယ်။
စစ်ရှောင်ရင်း ပျောက်ဆုံးနေတဲ့ ၎င်းအမျိုးသမီးဟာ အသက် ၁၉ နှစ်အရွယ် မမိုးစံပယ်ထွန်းဆိုသူဖြစ်ပြီး မိသားစုဝင်နဲ့ ၇ လကြာ အဆက်အသွယ် ပြတ်တောက်သွားတာပဲ ဖြစ်ပါတယ်။
လက်ရှိ ဖြစ်ပွားနေတဲ့ နိုင်ငံရေးကြောင့် မမိုးစံပယ်ထွန်းအတွက် စိတ်ပူနေရပြီး ၎င်းကို တွေ့ရှိသူတွေအနေနဲ့ ဖုန်း 09-684 477 743 သို့ ဆက်သွယ်အကြောင်းကြားပေးဖို့ကိုလည်း တောင်းဆိုထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
