ယာရူစိင်း၊ ဖေဖော်ဝါရီ ၅ ရက်၊ လားရှိုး
ရှမ်းမြောက် လားရှိုးမြို့နဲ့ မိုင်းယော်ကြားမှာရှိတဲ့ TNLA ဂိတ်တစ်ခုဟာ ကုန်စည်ခွန်ဆိုပြီး ငွေ အဆမတန် တောင်းနေတယ်လို့ ကိုယ်တိုင် ကြုံတွေ့ခဲ့ရသူတွေက ရွှေဖီမြေကို ပြောပါတယ်။
မိုင်းယန်းရွာဂိတ်မှာရှိတဲ့ တအာင်းတပ် ဂိတ်တစ်ခုဟာ ကုန်စည်ခွန်ဆိုပြီး ဓာတ်ဆီ တစ်ပေပါကို ၃ သောင်းကျပ်နှုန်းနဲ့ ကောက်ခံနေတယ်လို့ မြေပြင်အခြေအနေ သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“အထက်က လူကြီးတွေ ညွှန်ကြားထားလားတော့ မသိဘူး။ နည်းနည်းလျှော့ပေးဖို့ သွားပြောလည်း မရဘူး ပြောနေလို့။ ၅ ပေပါဆိုရင် ၁ သိန်းခွဲ ကျတယ်။ တစ်ပေပါ ၃ သောင်းဆိုတာ အရမ်းများတယ်လေဗျ”
ကုန်စည်ခွန် တစ်ပေပါကို ၃ သောင်းနှုန်းနဲ့ ကောက်ခံနေတာဟာ လူထုတွေအတွက် အဆင်မပြေသလို များတဲ့ပမာဏ ဖြစ်တာကြောင့် လျှော့ပြီး ကောက်ခံပေးဖို့ မျှော်လင့်နေကြောင်းလည်း ပြောပါတယ်။
နောက်ထပ် မြေပြင်အခြေအနေ သိရှိသူ အမျိုးသားတစ်ဦးက “ကုန်စည်ခွန် ကောက်ခံတာနဲ့ ပတ်သက်ပြီး ကျနော်လည်း လူထုတွေဆီက အသံတွေ ကြားနေရပါတယ်။ အခုခေတ်ကာလမှာ အဲပိုက်ဆံလောက် တောင်းတာက လွန်တယ်လေနော်။ ပြောတော့ တအာင်းတပ်တွေ အခုအခွန်ကောက်ခံတာ မရှိရဘူးဆို ခုကျ ကောက်နေတာဘဲဗျ။ ပြေစာနဲ့လည်း မဟုတ်ဘူးဆိုတော့ အောက်ခြေက တပ်သားတွေဘဲ လုပ်စားနေတာ ထင်တယ်ဗျ” လို့ ပြောပါတယ်။
အခွန်နဲ့ ပတ်သက်ပြီး လူထုရဲ့ အခက်အခဲ အကျပ်အတည်းကို ဖြေရှင်းနိုင်ဖို့အတွက် စက်သုံးဆီ၊ အိမ်သုံးပရိဘောဂနဲ့ စားသောက်ကုန်ပစ္စည်းကို ကင်းလွှတ်ခွင့် ပေးထားတယ်လို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးက ပြောပါတယ်။
“ကင်းလွှတ်ခွင့်တွေကို ကျမတို့ အောက်ခြေမှာ ကောက်ခံနေတဲ့ တပ်သားတွေကိုလည်း ကျမတို့က ဒီစာတွေကို ဖြန့်ဝေထားပါတယ်။ ဒါကြောင့် မိဘပြည်သူလူထုတွေအနေနဲ့ ဒီသုံးမျိုးနဲ့ ပတ်သက်ပြီး တအာင်းပြည်အတွင်းမှာ အခွန်ကင်းလွှတ်ခွင့်ရမှာ ဖြစ်ပါတယ်။ တစ်ကယ်လို့ ဒီအခွန်တွေကို မတရား ကောက်ခံနေရတာမျိုးရှိရင် ပြည်သူ့ဆက်ဆံရေးစင်တာကနေတဆင့် တိုင်ကြားပြီး ဆက်သွယ်နိုင်ပါတယ်”
မိုင်းယော်မြို့ကနေ မိုင်းယန်းကျေးရွာ လမ်းတစ်လျှောက်လုံးမှာ စစ်တပ်က ကုန်စည်ခွန်ကို ကောက်ခံတာမရှိဘဲ တအာင်းတပ်ကဘဲ ကောက်ခံတာ ရှိနေတယ်လို့ ဒေသခံတွေ ပြောပြချက်အရ သိရပါတယ်။
