ယာရူစိင်၊ ဖေဖော်ဝါရီ ၂၆ ရက်၊ မူဆယ်
စစ်ကောင်စီတပ်ထိန်းချုပ်ထားတဲ့ တရုတ်-မြန်မာ မူဆယ်မြို့က လူမြင်ကွင်း လမ်းမပေါ်မှာ လုယက်မှု ဖြစ်ပွားပြီး တစ်ပတ်အတွင်း မူဆယ်မှာ လုယက်မှု ၃ ကြိမ်ထက်မနည်း ဖြစ်ပွါးထားတယ်လို့ ဒေသခံတွေက ရွှေဖီမြေကို ပြောပါတယ်။
မနေ့ ဖေဖော်ဝါရီ ၂၅ ရက် ညနေပိုင်းအချိန်မှာ မူဆယ်မြို့ ပြည်ထောင်စုလမ်းမကြီးပေါ်ရှိ ရွှေရာစု ဟိုတယ်အရှေ့ လမ်းမပေါ်မှာ ဆိုင်ကယ်မောင်းပြီး ပိုက်ဆံအိတ်ကိုင်ဆောင်ထားတဲ့ အမျိုးသမီးနှစ်ဦးနောက်ကို ဆိုင်ကယ်မောင်းတဲ့ အမျိုးသားနှစ်ဦးက နောက်ကနေ ကပ်လိုက်ပြီး လုယက်သွားတယ်လို့ မူဆယ်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“ထိခိုက်တာမျိုးတော့ မရှိဘူး။ ဒီတိုင်း ပိုက်ဆံအိတ်လုသွားတော့ ဆိုင်ကယ်မှောက်သွားတယ်ပေါ့။ အိတ်ထဲ ပါသွားတဲ့ပစ္စည်းတွေတော့ ကျနော်လဲ မသိရပါဘူးဗျ”
မူဆယ်မြို့ တရားဥပဒေစိုးမိုးရေး အားနည်းနေတာကြောင့် လုယက်မှုဖြစ်ပွားတာဟာ ကိစ္စအသေးအမွှားလောက်ဘဲ ရှိတယ်လို့ နောက်ထပ်မူဆယ်မြို့ဒေသခံ အမျိုးသားတစ်ဦးက ပြောပါတယ်။
“မူဆယ်မြို့ရဲ့ အခြေအနေက ကိုယ်ဖြစ်ကိုယ်ခံပေါ့နော်။ ဆိုင်ကယ်နဲ့ ပိုက်ဆံအိတ် လုတာလောက်တော့ ဘာမှ အထွေအထူးမဟုတ်တော့ဘူး။ သေနတ်အရှည်ကြီးတွေနဲ့ ဓားပြတိုက်ခံရတာတောင်မှ အမှုပေါ်ခဲ့တာမှမဟုတ်တာ။ အဲဒါကြောင့် မူဆယ်မြို့က လူထုတွေလဲ သတိနဲ့နေကြတယ်။ တကယ်လို့ ဖြစ်သွားရင်လဲ ဘယ်သူ့ကိုတိုင်လို့တိုင်ရမှန်း မသိတော့ဘူး။ တိုင်တော့လဲ အမှုက ပေါ်တာမှ မဟုတ်တာ”လို့ ဆိုပါတယ်။
မူဆယ်မြို့မှာ လူသတ်မှု၊ ဓားပြတိုက်မှုနဲ့ လုယက်မှု မကြာခဏဖြစ်ပွားလည်း ဘယ်အမှုကိုမှ သက်ဆိုင်ရာဌာနတွေက ဖော်ထုတ်နိုင်ခဲ့တာ မရှိဘူးလို့ အထက်ပါ သတင်းအရင်းအမြစ်က ဆက်ပြောပါတယ်။
နောက်ထပ် သတင်းအရင်းအမြစ် အမျိုးသားတစ်ဦးက “မူဆယ်မြို့ရဲ့ တရားဥပဒေပိုင်းဆိုင်ရာလုပ်ဆောင်ချက်တွေက ပြီးဆုံးသွားပြီး မရှိတော့တဲ့ ပုံစံမျိုးဖြစ်နေတယ်ပေါ့။ လူသေလဲ ဘာသတင်းမှ မကြားရဘူး ပြီးဆုံးသွားတယ်။ မူဆယ်မြို့ရဲ့ အခြေအနေက အတော်လေး ဆိုးလာတယ် ကြောက်စရာကောင်းတဲ့ မြို့ဖြစ်နေပါပြီဗျ”
စစ်တပ်က အာဏာသိမ်းပြီးနောက်ပိုင်းကတည်းက မူဆယ်မြို့မှာ မူးယစ်ဆေးဝါး ရောင်းဝယ်သုံးစွဲသူနဲ့ လောင်းကစားဝိုင်း မူလထက်ပိုများလာပြီး ခိုးမှု၊ လုယက်မှုနဲ့ ဓားပြတိုက်မှုလည်း မကြာခဏဖြစ်ပွါးနေတဲ့ မြို့လည်း ဖြစ်နေပါတယ်။
