ရွှေဖီမြေ၊ ဧပြီ ၂၆ ရက်၊ ရွာငံ
ရှမ်းတောင် ရွာငံမြို့နယ်မှာ စစ်ရှောင်အမျိုးသမီးတွေကို စစ်ကောင်စီတပ်သားက အုပ်စုလိုက် အဓမ္မပြုကျင့်နေတယ်လို့ ရှမ်းလူ့အခွင့်အရေးမဏ္ဍိုင်- SHRF ရဲ့ ဧပြီ ၂၄ ရက်က ထုတ်ပြန်တဲ့ အစီအရင်ခံစာမှာ ဖော်ပြထားပါတယ်။
ပြီးခဲ့တဲ့ ၂၀၂၃ ခုနှစ် မေလ ၆ ရက် မနက်အစောပိုင်းမှာ မျက်ခါးအင်းရွာဘက် စစ်ကြောင်း ထိုးလာတဲ့ စစ်ကောင်စီရဲ့ တပ်မ(၅၅) တပ်သား ၆ ဦးက မျက်ခါးအင်းရွာ မရောက်ခင် တောထဲ စစ်ရှောင်နေတဲ့ အသက် ၁၆ နှစ်မှ ၁၈ နှစ်အရွယ် ရွာခံအမျိုးသမီး ၃ ဦးကို အုပ်စုလိုက် အဓမ္မပြုကျင့်ခဲ့တယ်လို့ ဆိုပါတယ်။
အလားတူ ပြီးခဲ့တဲ့ ၂၀၂၃ ခုနှစ်မှာ စစ်ကောင်စီ တပ်မ(၅၅) တပ်သားက စစ်ရှောင်တွေကို ကူညီပေးနေတဲ့ ၂၃ နှစ်အရွယ် မမိုးမိုးကို ရွာငံရဲစခန်းသို့ ဖမ်းဆီးသွားပြီး သူမကို နည်းမျိုးစုံနဲ့ ရိုက်နှက်နှိပ်စက်ခဲ့တဲ့အပြင် အမျိုးသမီးအင်္ဂါအတွင်း နံပါတ်တုတ်နဲ့ ထိုးသွင်းတာ၊ ရင်သားတွေကို ခါးပတ်နဲ့ ရိုက်နှက်ခဲ့ကြောင်း မမိုးမိုးနဲ့အတူ ဖမ်းဆီးခဲ့ရပြီး ပြန်လွှတ်လာတဲ့ အမျိုးသမီရဲ့ ပြောကြားချက်အရ သိရတယ်လို့ ထုတ်ပြန်ထားပါတယ်။
၂၀၂၃ ခုနှစ် မတ်လကနေ ၂၀၂၄ ခုနှစ် နိုဝင်ဘာလအထိ ရွာငံမြို့နယ်မှာ စစ်ကောင်စီတပ်ရဲ့ ဖမ်းဆီးရိုက်နှက်မှုကြောင့် အမျိုးသမီး ၂ ဦးနဲ့ အမျိုးသား ၄ ဦး သေဆုံးခဲ့တယ်လို့ SHRF ရဲ့ ထုတ်ပြန်ချက်မှာ ဖော်ပြထားပါတယ်။
၂၀၂၂ ခုနှစ် မေလကနေ ၂၀၂၄ ခုနှစ် ဒီဇင်ဘာလအထိ ရွာငံနဲ့ သာစည်မြို့နယ်မှာ စစ်တပ်ရဲ့ မီးရှို့ ဖျက်ဆီးမှုကြောင့် နေအိမ် ၂၀၅ လုံး၊ တဲ ၇ လုံး၊ ဆိုင်ခန်း ၁ ခန်း၊ ဆိုင်ကယ် ၂ စီးနဲ့ လယ်ယာသုံးပစ္စည်း မီးလောင်ပျက်စီးခဲ့ပြီး နေအိမ် ၂၀ ကျော်၊ ဘုန်းကြီးကျောင်းတစ်ကျောင်းနဲ့ ဆိုင်ခန်းတစ်ခန်း ဖောက်ထွင်းခံခဲ့ရတယ်လို့ ဆိုပါတယ်။
ပြီးခဲ့တဲ့ ဇန်နဝါရီလအတွင်း ရွာငံနဲ့ ရပ်စောက်မြို့နယ်မှာ စစ်တပ်ရဲ့ လေကြောင်း တိုက်ခိုက်မှုနဲ့ လက်နက်ကြီး ပစ်ခတ်မှုကြောင့် အရပ်သား ၃ ဦး သေဆုံးခဲ့ပြီး ၁၄ ဦး ထိခိုက်ဒဏ်ရာ ရခဲ့တယ်လို့လည်း အစီအရင်ခံစာမှာ ဖော်ပြထားပါတယ်။
