မိုင်းရူပ၊ အောက်တိုဘာ ၁၃ ရက်၊ ပြင်ဦးလွင်
မန္တလေးတိုင်း ပြင်ဦးလွင်မြို့မှာ ရှမ်းမြောက် ကျောက်မဲမြို့ပေါ်က ဒေသခံ သားအမိနှစ်ဦး လုပ်ကြံသတ်ဖြတ်ခံရကာ မိခင်ဖြစ်သူ သေဆုံးပြီး သမီးဖြစ်သူ မီးလောင်ဒဏ်ရာနဲ့ ဆေးကုသနေရတယ်လို့ ရွှေဖီမြေက စုံစမ်းသိရှိရပါတယ်။
ကျောက်မဲမြို့ခံ ဒေါ်နန်းရွှေစိန်ဟာ ပြင်ဦးလွင်မြို့ရှိ ဘော်ဒါဆောင်တစ်ခုမှာ ကျောင်းတက်နေတဲ့ သမီးဖြစ်သူထံ သွားခဲ့ရာ၊ ပြီးခဲ့တဲ့ အောက်တိုဘာ ၈ ရက်နေ့က ဘော်ဒါဆောင်မှာ မုန့်ရောင်းနေတဲ့ အမျိုးသမီးတစ်ဦးက သူမကို အကူအညီတောင်းပြီး ကျောင်းအပြင်သို့ ခေါ်ဆောင်သွားရာကနေ လုပ်ကြံသတ်ဖြတ်ခဲ့တာ ဖြစ်ပါတယ်။
“သူသမီးဆီ သွားတာ။ သွားတဲ့အချိန်မှာ ဘော်ဒါမှာ မုန့်ရောင်းနေတဲ့ အမျိုးသမီးက အကူအညီတောင်းပြီး အပြင်ကို ခေါ်သွားတာ။ တော်တော်နဲ့ မပြန်လာတော့ဘူး။ သူ့သမီးက ဖုန်းဆက်လည်း မကိုင်ဘူး။ နောက်တော့ ဖုန်းပိတ်သွားတယ်” လို့ သေဆုံးသွားတဲ့ ဒေါ်နန်းရွှေစိန်နဲ့ နီးစပ်သူတစ်ဦးက ရွှေဖီမြေကို ပြောပါတယ်။
အဲ့ဒီနောက် ဘော်ဒါဆောင်မှာ ကျန်နေတဲ့ ဒေါ်နန်းရွှေစိန်ရဲ့ သမီးဖြစ်သူကိုလည်း မုန့်ရောင်းနေတဲ့ အမျိုးသမီးက ဆိုင်ကယ်နဲ့ လာရောက်ခေါ်ဆောင်ခဲ့ပြီး လမ်းအလယ်မှာ ဦးခေါင်းကို ပုလင်းနဲ့ရိုက်ပြီး ဓာတ်ဆီဖြင့် မီးရှို့ခဲ့ပေမယ့် ပတ်ဝန်းကျင်လူများအကူအညီနဲ့ အသက်ဘေးမှ လွတ်မြောက်ခဲ့တယ်လို့ သူက ဆက်ပြောပါတယ်။
“သူ့အမေကို သတ်သွားတယ်လို့ ယူဆရတဲ့ မိန်းမက သူ့သမီးကို ပြန်လာခေါ်တယ်။ နင်အမေခေါ်ခိုင်းတာတဲ့။ ကလေးမက လိုက်သွားတော့ လူမရှိတဲ့ နေရာရောက်တော့ ပုလင်းနဲ့ ခေါင်းကို ရိုက်တာ၊ ကြိုးနဲ့ ချည်ပြီး ဓာတ်ဆီလောင်း မီးရှို့တာ။ ကလေးမက ပြေးလို့ လွတ်သွားတာ”
လက်ရှိ မီးလောင်ဒဏ်ရာရ ၁၂ တန်းကျောင်းသူဟာ ပြင်ဦးလွင်ဆေးရုံမှာ ဆေးကုသမှုခံယူနေနေပြီး၊ ပစ်မှုကျူးလွန်သူလို့ သံသယရှိသူ နန်းမိုဟွမ်ခမ်းဆိုသူကတော့ လက်ရှိအချိန်အထိ လွတ်မြောက်နေဆဲ ဖြစ်ပါတယ်။
အခုလို သားအမိနှစ်ဦး လုပ်ကြံသတ်ဖြတ်ခံရမှုအပေါ် ဘယ်လို ရန်ညှိုးရန်စရှိခဲ့သလဲဆိုတာ မသိရသေးပါဘူး။
သေဆုံးသွားတဲ့ ဒေါ်နန်းရွှေစိန်ဟာ ကျောက်မဲမြို့မှာ သီးနှံမျိုးစုံ ရောင်းချနေသူဖြစ်ပြီး၊ သူမရဲ့ အလောင်းကို ပြန်တွေ့စဉ် မျက်နှာတစ်ဖက်လုံး ရိုက်နှက်ခံထားရတဲ့ ဒဏ်ရာနဲ့ သေဆုံးနေလို့ သိရပါတယ်။
စစ်ကောင်စီဘက်ကတော့ ပြင်ဦးလွင်မြို့မှာ သားအမိနှစ်ဦး လုပ်ကြံသတ်ဖြတ်ခံရမှုနဲ့ ပတ်သက်ပြီး တစ်စုံတရာ သတင်းထုတ်ပြန်မှု မရှိသေးပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
