ပို့လဘား၊ ဇူလိုင် ၃၀ ရက်၊ ကျောက်မဲ
ရှမ်းမြောက် နောင်ချိုမြို့ကနေ တအာင်းတပ်မတော် PSLF/TNLA ထိန်းချုပ်ထားတဲ့ ကျောက်မဲမြို့အနီး နောင်ပိန်ကျေးရွာဘက်ကို စစ်ကောင်စီတပ်က လက်နက်ကြီးနဲ့ ပစ်ခတ်တိုက်ခိုက်ခဲ့လို့ ကိုရင်တစ်ပါး ပျံလွန်တော်မူပြီး ဒေသခံ ၅ ဦးလည်း ထိခိုက်ဒဏ်ရာရရှိခဲ့ပါတယ်။
စစ်ကောင်စီတပ်က ဒီနေ့ ဇူလိုင်လ ၃၀ ရက် နေ့လည် ၂ နာရီခွဲမှာ ပစ်ခတ်တိုက်ခိုက်ခဲ့တာဖြစ်ပြီး ပျံလွန်တော်မူသွားတဲ့ ကိုရင်နဲ့ ဒဏ်ရာရသွားသူတွေဟာ နောင်ချိုကနေ စစ်ရှောင်လာကြတဲ့ ဒေသခံတွေ ဖြစ်တယ်လို့ သိရပါတယ်။
“ဆေးရုံမှာ ၁ လုံးကျတယ်။ ပုပ္ပါးရုံကျောင်းမှာ ၁ လုံးကျတာ။ ကိုရင်ရဲ့ လက်တစ်ဖက်က ပြတ်ထွက်သွားတယ်။ သူတို့ပစ်လာတာ ၉ လုံး လောက် ရှိမယ်ထင်တယ်”လို့ ဒေသခံတစ်ဦးက ပြောပါတယ်။
စစ်ကောင်စီတပ်ဟာ ၎င်းပြန်ထိန်းချုပ်နေတဲ့ နောင်ချိုမြို့ကနေ TNLA ထိန်းချုပ်နေတဲ့ ကျောက်မဲမြို့နယ် နောင်ပိန်ကျေးရွာဘက်ကို လက်နက်ကြီးတွေနဲ့ နေ့စဉ် ပစ်ခတ်တိုက်ခိုက်နေတာလို့ ဆိုပါတယ်။
တိုက်ပွဲတွေကြောင့် နောင်ပိန်ကျေးရွာကို စစ်ရှောင်လာတဲ့ ဒေသခံတွေဟာ စစ်ကောင်စီရဲ့ လက်နက်ကြီး ပစ်ခတ်တာတွေကြောင့် တစ်ဖန်ပြန်လည် တိမ်းရှောင်နေရတာ ဖြစ်ပါတယ်။
ပြီးခဲ့တဲ့ ဇူလိုင်လ ၂၈ ရက်ကလည်း ကျောက်မဲမြို့နယ် နောင်ပိန်ကျေးရွာကို စစ်ကောင်စီတပ်ဘက်က လက်နက်ကြီး ပစ်ခတ်ခဲ့တာကြောင့် အရပ်သား ၁ ဦး သေဆုံးခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
